નવી દિલ્હી, 6 નવેમ્બર 2026: ધનતેરસના પવિત્ર અવસર પર વડાપ્રધાન નરેન્દ્ર મોદીએ સમગ્ર દેશવાસીઓને હાર્દિક શુભકામનાઓ પાઠવી છે. પીએમ મોદીએ આરોગ્યના દેવ ભગવાન ધન્વંતરિને વંદન કરીને સૌના જીવનમાં સુખ, શાંતિ અને ઉત્તમ સ્વાસ્થ્ય જળવાઈ રહે તેવી મંગલકામના કરી છે. આ પવિત્ર પ્રસંગે વડાપ્રધાને સોશિયલ મીડિયા પ્લેટફોર્મ પર ભગવાન ધન્વંતરિની સ્તુતિ કરતો એક સંસ્કૃત શ્લોક પણ શૅર કર્યો હતો.
વડાપ્રધાન નરેન્દ્ર મોદીએ પોતાના શુભેચ્છા સંદેશમાં લખ્યું હતું કે, “સમગ્ર દેશવાસીઓને ધનતેરસની અનંત શુભકામનાઓ. ભગવાન ધન્વંતરિની દિવ્ય કૃપાથી દરેકનું જીવન સુખ, શાંતિ અને ઉત્તમ સ્વાસ્થ્યથી સદા આલોકિત રહે. દરેક પરિવારમાં ઉમંગ અને આનંદનો અખંડ દીપ પ્રજ્વલિત રહે, તેવી જ મારી પ્રભુ ચરણોમાં પ્રાર્થના છે.”
PM મોદીએ શૅર કર્યો ભગવાન ધન્વંતરિનો પવિત્ર શ્લોક
વડાપ્રધાને ધનતેરસના શુભ દિને ભગવાન ધન્વંતરિને સમર્પિત સંસ્કૃત શ્લોક શૅર કરીને તેમના મહિમાનું સ્મરણ કર્યું હતું:
“નમામિ ધન્વન્તરિમાદિદેવં સુરાસુરૈર્વન્દિતપાદપદ્મમ્।લોકે જરારુગ્ભયમૃત્યુનાશં દાતારમીશં વિવિધૌષધીનામ્॥”
શ્લોકનો ભાવાર્થ: હું આદિદેવ ભગવાન ધન્વંતરિને શ્રદ્ધાપૂર્વક નમન કરું છું, જેમના ચરણકમળોની દેવો અને અસુરો બંને વંદના કરે છે. તેઓ આ સંસારમાં વૃદ્ધાવસ્થા, રોગ, ભય અને મૃત્યુના કષ્ટોનો નાશ કરનારા તથા વિવિધ ઔષધિઓના દાતા અને પરમેશ્વર છે.
ધનતેરસ પર ભગવાન ધન્વંતરિની પૂજાનું વિશેષ મહત્વ
સનાતન પરંપરામાં ધનતેરસને ‘ધનત્રયોદશી’ તરીકે પણ ઓળખવામાં આવે છે. આ દિવસે ધનની સાથે સાથે આરોગ્યના દેવ ભગવાન ધન્વંતરિની પૂજાનું વિશેષ ધાર્મિક મહત્વ છે. પૌરાણિક માન્યતાઓ અનુસાર, સમુદ્ર મંથન દરમિયાન ભગવાન ધન્વંતરિ હાથમાં અમૃત કળશ લઈને પ્રગટ થયા હતા. આથી જ ધનતેરસના દિવસે ધન-સમૃદ્ધિની સાથે નિરોગી કાયા અને દીર્ઘાયુ માટે ભગવાન ધન્વંતરિની વિશેષ આરાધના કરવામાં આવે છે.
આરોગ્ય અને દીર્ઘાયુ માટે મંત્ર જાપનું મહત્વ
આયુર્વેદના તબીબો અને શ્રદ્ધાળુઓ ધનતેરસ તેમજ ધન્વંતરિ જયંતીના દિવસે ઉત્તમ સ્વાસ્થ્ય અને રોગમુક્ત જીવનની કામના સાથે આ શ્લોકનો પાઠ કરે છે. પીએમ મોદીના આ સંદેશથી ધાર્મિક અને આધ્યાત્મિક મહત્વની સાથે સાથે ‘સ્વાસ્થ્ય એ જ જીવનની સૌથી મોટી મૂડી છે’ તેવો સંદેશ પણ સમાજમાં વહેતો થયો છે.
