G-20: 22 મેથી શ્રીનગરમાં પ્રવાસન પ્રતિનિધિઓની યોજાશે બેઠક,વૈશ્વિક પ્રવાસનની નવી તસ્વીર ખેચવા કાશ્મીર તૈયાર
શ્રીનગર : એક સમયે આતંકનો ગઢ ગણાતું કાશ્મીર હવે વૈશ્વિક પ્રવાસનની નવી તસ્વીર ખેંચવા માટે તૈયાર છે. ભારતની G-20 અધ્યક્ષતા હેઠળ ત્રણ દિવસીય બીજી ટુરિઝમ વર્કિંગ ગ્રુપ ગ્લોબલ (TWG) બેઠક 22 થી 24 મે દરમિયાન શ્રીનગરમાં યોજાવા જઈ રહી છે. આ સાથે કાશ્મીરમાં એક નવો સકારાત્મક તબક્કો શરૂ થશે.
છેલ્લા 70 વર્ષમાં પ્રથમ વખત કેન્દ્ર જમ્મુ અને કાશ્મીર G-20 જેવી વૈશ્વિક ઈવેન્ટનું આયોજન કરી રહ્યું છે. સંમેલનમાં દેશ અને દુનિયાના પ્રતિનિધિઓની હાજરીથી લોકો ઉત્સાહિત છે અને કાર્યક્રમને સફળ બનાવવા માટે જમ્મુ-કાશ્મીર પ્રશાસનને સંપૂર્ણ સહયોગ આપી રહ્યા છે. આ ઇવેન્ટ માત્ર ભારતમાં જ નહીં પરંતુ સમગ્ર વિશ્વમાં જમ્મુ અને કાશ્મીરની પર્યટન સ્થળ તરીકેની સંભવિતતાને દર્શાવવામાં એક ઐતિહાસિક પગલું ચિહ્નિત કરશે. વિદ્યાર્થીઓ સહિત J&K ની સામાન્ય જનતા મુખ્ય સભા પહેલા વિવિધ કાર્યક્રમોમાં વ્યાપકપણે ભાગ લઈ રહી છે.
G-20 સમિટ પહેલા શનિવારે શ્રીનગરના જબરવાન પાર્કમાં હોટ એર બલૂન રાઇડ અને ટ્રેકિંગ અભિયાન શરૂ કરવામાં આવ્યું છે. જેનું ઉદ્ઘાટન પ્રવાસન સચિવ સૈયદ આબિદ રશીદ શાહે કર્યું હતું. હોટ એર બલૂન રાઈડથી પ્રવાસીઓ આકાશમાંથી ખીણની સુંદરતા નિહાળી શકશે. પ્રવાસીઓ માટે આ એક રોમાંચક અનુભવ હશે.
સંમેલનના મુખ્ય સ્થળ ડલ તળાવના કિનારે આવેલા શેર-એ-કાશ્મીર ઇન્ટરનેશનલ કોન્ફરન્સ સેન્ટરમાં 7.5 કરોડ રૂપિયાનું ડિજિટલ ઈન્ફ્રાસ્ટ્રક્ચર વિકસાવવામાં આવ્યું છે. મુલાકાતીઓનું સ્વાગત વિવિધ સ્થળોએ રાષ્ટ્રધ્વજના લીલા, સફેદ અને કેસરી રંગોમાં પ્રકાશિત લેમ્પપોસ્ટ દ્વારા કરવામાં આવશે.
G-20 સમિટમાં ભાગ લેનાર વિદેશી મહેમાનો માત્ર કાશ્મીર, પૃથ્વી પરના સ્વર્ગને જ નહીં, પરંતુ તેની સંસ્કૃતિને પણ નજીકથી જાણશે. સંમેલનને વિશેષ અને યાદગાર બનાવવા માટે ભવ્ય આયોજન કરવામાં આવ્યું છે.
