અમદાવાદઃ શહેરમાં ફરી એકવાર ગેસનો બાટલો ફાટવાની ઘટના સામે આવી છે. શહેરના અમરાઈવાડી વિસ્તારમાં ઘંટી બસ સ્ટેન્ડ પાસે આવેલા એક મકાનમાં બાટલો ફાટ્યો હતો. જેથી નાસભાગ મચી ગઈ હતી. આ બનાવમાં 3 વ્યક્તિઓ ઘાયલ થઈ હતી. જે પૈકી એકની હાલત ગંભીર હોવાનું જાણવા મળે છે. ગેસનો બાટલો લિકેજ થતા આ દૂર્ઘટના સર્જાઈ હોવાનું જાણવા મળે છે.
પ્રાપ્ત માહિતી અનુસાર અમરાઈવાડી વિસ્તારમાં એક મકાનમાં ગેસનો બાટલો ફાટ્યા બાદ આગ લાગી હતી. સિલિન્ડર લીકેજ થતા આ બનાવ બન્યો હોવાનું જાણવા મળે છે. આ ઘટનામાં મકાનની એક દીવાલ તૂટી તેમજ મકાનમાં તિરાડો પડી ગઈ હોવાનું જાણવા મળે છે. આ બનાવમાં જયવીરભાઈ, સીનોદભાઈ અને એક સગીરને ઈજા થઈ હતી. જેથી તેમને સારવાર અર્થે તાત્કાલિક હોસ્પિટલ લઈ જવાયાં હતા. જ્યાં એક વ્યક્તિની હાલત ગંભીર હોવાનું જાણવા મળે છે. આ બનાવની જાણ થતા ફાયર બ્રિગેડની ટીમ તાત્કાલિક સ્થળ પર દોડી ગઈ હતી. તેમજ આગ ઉપર કાબુ મેળવવા માટે પાણીનો મારો ચલાવ્યો હતો. તેમજ આ દૂર્ઘટના કેવી સર્જાઈ તે જાણવા માટે તપાસ આરંભી હતી. આ ઘરમાં રહેતો પરિવાર આજે જ બહાર ગામથી એક મહિના બાદ પરત ફર્યો હતો. તેમજ પરિચીત પાસેથી ગેસનો બાટલો લીધો હતો.
(PHOTO-FILE)
