હૈદરાબાદ, 10 સપ્ટેમ્બર 2026: તેલંગાણાના મહબૂબનગર જિલ્લામાં વહેલી સવારે પ્રાણીઓનું પરિવહન કરી રહેલું એક કેન્ટર ટ્રક વીજળીના થાંભલા સાથે અથડાયું હતું. અથડામણને કારણે વાહનમાં આગ લાગી ગઈ હતી. આ અકસ્માતમાં ડ્રાઈવરનું મૃત્યુ થયું હતું અને આગમાં આશરે 200 બકરાં ભડથું થઈ ગયાં હતાં.
ફાયર વિભાગના એક અધિકારીના જણાવ્યા અનુસાર, આ ઘટના સવારે લગભગ 4 વાગ્યે નેશનલ હાઈવે-44 પર બુથુર ગામ નજીક બની હતી. કેન્ટર સંપૂર્ણપણે આગની લપેટમાં આવી ગયું હતું.
વીજળીના થાંભલા સાથે અથડાયું
એક અધિકારીએ જણાવ્યું હતું કે, આશરે 150 થી 200 બકરાં લઈને જઈ રહેલું એક કેન્ટર ટ્રક વીજળીના થાંભલા સાથે અથડાયું હતું. એવી શક્યતા છે કે અથડામણને કારણે વાહનની ડીઝલની ટાંકી ફાટી ગઈ હતી અને તણખાને લીધે ભયાનક આગ લાગી હતી.
એક અધિકારીએ જણાવ્યું હતું કે વાહનચાલકનું ઘટનાસ્થળે જ મૃત્યુ થયું હતું, જ્યારે વાહનની અંદર ફસાયેલી બકરીઓ જીવતી બળી ગઈ હતી. ફાયર બ્રિગેડની ગાડીઓ ઘટનાસ્થળે પહોંચી હતી અને આગને કાબૂમાં લીધી હતી.
કેન્ટર (નાના ટ્રક)માં લાગેલી આગ કાબૂમાં આવ્યા બાદ, તે વાહન સંપૂર્ણપણે બળીને ખાખ થયેલું અને માત્ર તેનો માળખાગત ભાગ જ બાકી રહેલો જોવા મળ્યો હતો.
ઘટના અંગેની માહિતી મળતાં જ પોલીસ તાત્કાલિક ઘટનાસ્થળે પહોંચી હતી. ચાલકના મૃતદેહને પોસ્ટમોર્ટમ માટે મોકલવામાં આવ્યો છે.
વધુ વાંચો: ફિલિપાઇન્સમાં પ્રવાસીઓથી ભરેલી બોટમાં લાગી આગ, 5ના મોત
