ઈસ્લામાબાદ, 12 ઓક્ટોબર 2026: પાકિસ્તાનમાં વ્યાપેલી ગંભીર રાજકીય અસ્થિરતા અને કાયદો-વ્યવસ્થાની કથળતી સ્થિતિની અસર હવે ક્રિકેટ પર પણ સ્પષ્ટપણે જોવા મળી રહી છે. પાકિસ્તાન સરકાર દ્વારા તાજેતરમાં ખૈબર પખ્તુનખ્વા વિસ્તારમાં ઈમરજન્સી (આપાતકાલ) જાહેર કરવામાં આવ્યા બાદ પાકિસ્તાન ક્રિકેટ બોર્ડ (PCB)ને પોતાના ડોમેસ્ટિક ક્રિકેટનું શિડ્યુલ અને વેન્યૂ તાત્કાલિક ધોરણે બદલવાની ફરજ પડી છે. પાકિસ્તાનમાં ગત 12 સપ્ટેમ્બરથી પ્રેસિડેન્ટ કપ ફર્સ્ટ-ક્લાસ ટુર્નામેન્ટ શરૂ થઈ હતી, જેના મુકાબલા 24 ઓક્ટોબર સુધી રમાવાના છે.
નોંધનીય છે કે, પેશાવર અને એબટાબાદ જેવા મોટા ક્રિકેટ સેન્ટરો ખૈબર પખ્તુનખ્વા પ્રાંતની અંદર આવે છે. પાકિસ્તાન સરકાર દ્વારા આ વિસ્તારમાં ઈમરજન્સી અને ગવર્નર શાસન લાદવામાં આવ્યા બાદ PCBએ સુરક્ષાના કારણોસર પેશાવર અને એબટાબાદમાં રમાનારી મેચોના સ્થળો બદલીને શેખુપુરા અને લાહોર કરી દીધા છે. પ્રેસિડેન્ટ કપ પાકિસ્તાનની ગ્રેડ-1 ફર્સ્ટ-ક્લાસ ડોમેસ્ટિક ટુર્નામેન્ટ છે. અગાઉ આ મેચો પેશાવર, એબટાબાદ, ઇસ્લામાબાદ અને રાવલપિંડીમાં યોજાવાની હતી. જોકે, ઇસ્લામાબાદ અને રાવલપિંડીમાં યોજાનારી મેચો તેમના નિર્ધારિત સમયપત્રક મુજબ જ રમાશે.
પાકિસ્તાનના રાષ્ટ્રપતિ આસિફ અલી ઝરદારીએ સંવિધાનની કલમ 232(1) અને 234(1) હેઠળ ખૈબર પખ્તુનખ્વા પ્રાંતમાં ઈમરજન્સી લાદવાની જાહેરાત કરી છે. સતત વધી રહેલા આતંકવાદી હુમલા અને વહીવટી તંત્ર નિષ્ફળ જવાના કારણે સરકારે આ આકરો નિર્ણય લેવો પડ્યો હોવાનું બતાવવામાં આવી રહ્યું છે. હિંસક ઘટનાઓ અને અસુરક્ષાના વાતાવરણને કારણે સરકારી વ્યવસ્થા ખોરવાઈ જતાં ગવર્નર શાસન લાગુ કરાયું છે.
-
ફાઇનલ રાઉન્ડની તારીખોમાં ફેરફાર
ઈએસપીએન ક્રિકઇન્ફોના અહેવાલ મુજબ, હવે ફાઇનલ રાઉન્ડની એક મેચ એલએલસીએ (લાહોર સિટી ક્રિકેટ એસોસિએશન ગ્રાઉન્ડ) પર રમાશે, જ્યારે હૈદરાબાદ કિંગ્સમેન એકેડમી અને સ્ટેટ બેંક ઓફ પાકિસ્તાન વચ્ચેની મેચ ઇસ્લામાબાદના નેશનલ ક્રિકેટ ગ્રાઉન્ડ પર યોજાશે. આ ઉપરાંત ફાઇનલ રાઉન્ડની મેચોની તારીખ એક દિવસ આગળ વધારીને 19 ઓક્ટોબર કરવામાં આવી છે. ઉલ્લેખનીય છે કે પાકિસ્તાનમાં પ્રેસિડેન્ટ કપ છેલ્લા બે દાયકાથી સતત રમાડવામાં આવે છે.
