પાકિસ્તાનમાં મોંઘવારીમાં પીસાતી પ્રજાને મળશે રાહત, 10 લાખ મેટ્રીક ટન ખાંડની કરશે આયાત
નવી દિલ્હીઃ ભારતના પડોશી દેશ પાકિસ્તાન આર્થિક કંગાલીની હાલત ઉપર ઉભો છે અને દુનિયાના વિવિધ દેશો પાસે મદદ માટે હાથ લાંબો કરી રહ્યાં છે, જો કે, દુનિયાના દેશો પણ આતંકવાદીઓના આકા મનાતા પાકિસ્તાનને મદદ કરવા મામલે અંતર કરી રહ્યાં છે. બીજી તરફ પાકિસ્તાનમાં જીવનજરુરી વસ્તુઓના ભાવમાં તોતિંગ વધારો થયો છે. જેથી પ્રજાનું બજેટ ખોરવાયું છે, વીજળીના હજારોમાં બિલ અને ખાધ્ય ચીજવસ્તુઓના ભાવમાં થયેલા વધારાને પગલે હવે પ્રજા રસ્તા ઉપર ઉતરી આવી છે અને દેખાવો કરી રહ્યાં છે. બીજી તરફ પાકિસ્તાન સરકારે ખાંડના ભાવ નિયંત્રણમાં રહે તે માટે હવે ખાંડની આયાતનો નિર્ણય લીધો છે. તેમજ દક્ષિણ અમેરિકાથી ખાંડનો જથ્થો મેળવવા પ્રયાસો શરૂ કર્યાં છે.
પાકિસ્તાન સરકારે દેશમાં ખાંડની અછતને પહોંચી વળવા માટે 10 લાખ મેટ્રિક ટન ખાંડની આયાત કરવાનો નિર્ણય લીધો છે. પાકિસ્તાન સરકાર પ્રતિ કિલોગ્રામ 220 પાકિસ્તાની રૂપિયાના દરે ખાંડની આયાત કરશે. પાકિસ્તાનના લોકો પહેલાથી જ મોંઘવારીથી પીડાઈ રહ્યા છે અને તેમને ભારે કિંમત ચૂકવવાની ફરજ પડશે. પાકિસ્તાન ટ્રેડિંગ કોર્પોરેશને બ્રાઝિલમાં પાકિસ્તાનના કોન્સ્યુલેટ જનરલને પત્ર લખીને દક્ષિણ અમેરિકાના દેશમાંથી એક લાખ મેટ્રિક ટન ખાંડની આયાત કરવાની વ્યવસ્થા કરી છે.
સુગર મિલ માલિકો દ્વારા સરકારની ગેરમાર્ગે દોરાવાના કારણે હાલની સ્થિતિ સર્જાઈ છે. ખાંડની નિકાસ કરવા માટે સરકાર પાસેથી પરવાનગી મેળવવા માટે, તેમને ખાતરી આપવામાં આવી હતી કે દેશમાં ખાંડનો પૂરતો ભંડાર છે. જો કે, પાકિસ્તાનના પંજાબ પ્રાંતના ખાદ્ય વિભાગે ખાંડના વધારાના સ્ટોકના ઉપયોગને યોગ્ય ઠેરવ્યો છે. બીજી તરફ, વિભાગના પ્રવક્તાએ આગામી દિવસોમાં દેશમાં ખાંડની કટોકટી અંગે ચેતવણી આપી છે અને સરકારી અધિકારીઓ સમક્ષ ખાંડની અછતને દૂર કરવા માટે વધારાના ભંડારનો ઉપયોગ કરવાનો એકમાત્ર વિકલ્પ બચ્યો છે.
