વેનેઝુએલામાં મદદ માટે ભારતીય સેનાની મેડિકલ ટીમ અને ટનબંધ રાહત સામગ્રી રવાના

નવી દિલ્હી, 26 જૂન 2026: ઉત્તર વેનેઝુએલામા આવેલા વિનાશક ભૂકંપ બાદ, ભારતે તેની માનવતાવાદી સહાય અને આપત્તિ રાહત (HADR) ના ભાગ રૂપે ‘ઓપરેશન એમિસ્ટાડ’ શરૂ કર્યું છે. આ કામગીરી દ્વારા, ભારતે અસરગ્રસ્ત લોકોને તાત્કાલિક તબીબી સહાય પૂરી પાડવાની પહેલ કરી છે. ભારતીય સેનાની એક ખાસ મેડિકલ ટુકડી વેનેઝુએલા રવાના કરવામાં આવી છે.ભારતીય સેનાની 60 પેરા ફિલ્ડ હોસ્પિટલની 41 સભ્યોની ટીમ, જેમાં નવ અનુભવી લશ્કરી ડોકટરો પણ સામેલ છે, બે ભારતીય વાયુસેનાના વિમાનમાં વેનેઝુએલા જવા રવાના થઈ. આ ટીમ વેનેઝુએલામાના આપત્તિગ્રસ્ત વિસ્તારોમાં અસરગ્રસ્ત લોકોને કટોકટી તબીબી સેવાઓ, ગંભીર રીતે ઘાયલ લોકોની સારવાર, સર્જરી, ટ્રોમા મેનેજમેન્ટ અને સઘન સંભાળ પૂરી પાડશે.

ભારતીય સેનાના જણાવ્યા અનુસાર, મેડિકલ ટીમ તેમની સાથે આશરે છ ટન તબીબી પુરવઠો અને માનવતાવાદી રાહત સામગ્રી લાવી છે, જેમાં ભારતના આરોગ્ય મૈત્રી પ્રોજેક્ટ હેઠળ વિકસિત અત્યાધુનિક ભીષ્મ ક્યુબનો સમાવેશ થાય છે. તે એક મોડ્યુલર અને ઝડપથી તૈનાત કરી શકાય તેવી ફિલ્ડ હોસ્પિટલ છે. આ એક એવી સિસ્ટમ છે જે આપત્તિગ્રસ્ત વિસ્તારોમાં અદ્યતન ટ્રોમા કેર, ઇમરજન્સી સર્જરી અને સઘન સંભાળ સુવિધાઓ પૂરી પાડવા સક્ષમ છે.

દરમિયાન, વિદેશ મંત્રી એસ. જયશંકરે ટ્વિટર પર પોસ્ટ કર્યું કે ઓપરેશન એમિસ્ટાડ ચાલી રહ્યું છે. તેમણે લખ્યું, “ભારતીય વાયુસેનાના બે C-17 વિમાન ભૂકંપગ્રસ્ત વેનેઝુએલામાં રાહત અને બચાવ પ્રયાસોમાં મદદ કરવા માટે તાત્કાલિક રાહત પુરવઠો સાથે રવાના થયા. આ સહાયમાં 35 ટનથી વધુ રાહત પુરવઠો, દવાઓ અને તબીબી સાધનોનો સમાવેશ થાય છે, સાથે જ ભારતીય સેનાના ફિલ્ડ હોસ્પિટલ યુનિટનો પણ સમાવેશ થાય છે. બે ભીષ્મ ક્યુબ્સ પણ મોકલવામાં આવ્યા છે. ભારત આ મુશ્કેલ સમયમાં વેનેઝુએલાની સરકાર અને લોકોની સાથે ઉભું છે અને શક્ય તમામ સહાય પૂરી પાડવા માટે પ્રતિબદ્ધ છે.”

• મુશ્કેલ સમયમાં વેનેઝુએલાના લોકો સાથે એકતા દર્શાવતું ભારત

ભીષ્મ ક્યુબની સૌથી મોટી તાકાત એ છે કે તેને ટૂંકા સમયમાં સ્થાપિત કરી શકાય છે અને 200 દર્દીઓને સારવાર અને જીવનરક્ષક સંભાળ પૂરી પાડી શકે છે. આ સિસ્ટમે ભારતની આપત્તિ પ્રતિભાવ ક્ષમતાઓને નોંધપાત્ર રીતે મજબૂત બનાવી છે. તે વિશ્વભરના વિવિધ કટોકટીગ્રસ્ત વિસ્તારોમાં ઝડપી રાહત પૂરી પાડવા માટે વિકસાવવામાં આવી હતી.ભારતનું આ મિશન ફક્ત રાહત સામગ્રી મોકલવા પૂરતું મર્યાદિત નથી, પરંતુ કટોકટીના સમયમાં મિત્ર દેશો સાથે ઊભા રહેવાની ભારતની નીતિનું પણ પ્રતીક છે. વેનેઝુએલાના લોકો સાથે એકતા વ્યક્ત કરીને, ભારતે સ્પષ્ટ સંદેશ આપ્યો છે કે ભારત આ કટોકટીમાં મદદ કરવા માટે હાજર છે, અમે તમારી સાથે છીએ.

ઓપરેશન એમિસ્ટાડ ભારતના માનવતાવાદી દ્રષ્ટિકોણને પણ પ્રતિબિંબિત કરે છે, જે “વસુધૈવ કુટુંબકમ” ના સિદ્ધાંત પર આધારિત છે, જેનો અર્થ થાય છે “આખું વિશ્વ એક પરિવાર છે.” કુદરતી આફતો અને માનવતાવાદી કટોકટી દરમિયાન સહાય પૂરી પાડવાની ભારતની પરંપરાને ચાલુ રાખીને, આ ઓપરેશન વૈશ્વિક માનવતા, કરુણા અને સહયોગ પ્રત્યે દેશની પ્રતિબદ્ધતાનું બીજું ઉદાહરણ બન્યું છે.વેનેઝુએલાને રાહત અને તબીબી સહાયનું આ મિશન હજારો અસરગ્રસ્ત લોકોમાં આશા લાવશે. આ પ્રયાસ આંતરરાષ્ટ્રીય સ્તરે ભારતની છબીને એક વિશ્વસનીય અને જવાબદાર માનવતાવાદી બળ તરીકે પણ મજબૂત બનાવશે.