રામગઢ, 22 ઓગસ્ટ 2026: ઝારખંડના રામગઢ જિલ્લામાં આવેલા ‘મા છિન્નમસ્તિકા સિમેન્ટ એન્ડ સ્ટીલ પાવર પ્લાન્ટ’માં ટર્બાઇનમાં થયેલા જોરદાર વિસ્ફોટ બાદ ભીષણ આગ ફાટી નીકળી હતી. આ દુર્ઘટનામાં ત્રણ એન્જિનિયરોનાં મોત થયાં હતાં, જ્યારે એક વ્યક્તિ ગંભીર રીતે ઘાયલ થઈ હતી. મૃતકોની ઓળખ રાંચીના સંજીવ કુમાર કેસરી, બોકારોના વિનીત મહતો અને ગઢવાના અભિષેક પાંડે તરીકે કરવામાં આવી છે.
પ્રાથમિક માહિતી અનુસાર, અતિશય તાપમાનને કારણે પ્લાન્ટની સુરક્ષા પ્રણાલી કાર્યરત થઈ શકી ન હતી. આનાથી ટર્બાઇનની ગતિમાં અચાનક વધારો થયો અને પરિણામે વિસ્ફોટ થયો. અકસ્માતની જાણ થતાં જ અગ્નિશમન દળની અનેક ગાડીઓ ઘટનાસ્થળે પહોંચી હતી. ભારે જહેમત બાદ આગને કાબૂમાં લેવામાં આવી હતી.
પ્લાન્ટના કર્મચારીઓનો આરોપ છે કે કંટ્રોલ રૂમમાં વધતા તાપમાન અને ઠંડકની પૂરતી વ્યવસ્થાના અભાવ અંગે મેનેજમેન્ટને અગાઉથી જાણ કરવામાં આવી હતી, તેમ છતાં સમયસર કોઈ પગલાં લેવામાં આવ્યા ન હતા.
અકસ્માતથી રોષે ભરાયેલા ગ્રામજનો અને સ્થાનિક રહેવાસીઓએ આજે રામગઢ-પાતરાતુ રોડ જામ કર્યો હતો અને અસરગ્રસ્ત પરિવારોના સભ્યો માટે વળતર તથા નોકરીની માંગણી કરી હતી.
વધુ વાંચો: મધ્ય પ્રદેશ: નાગપુર-બેતુલ હાઈવે પર માર્ગ અકસ્માત, 3 લોકોનાં મોત અને 9 ઘાયલ
