પાલઘર, 21 ઓક્ટોબર 2026: મહારાષ્ટ્રના પાલઘર જિલ્લામાં, ગામના મેળામાંથી પોતાની આશ્રમ શાળાએ પરત ફરી રહેલા વિદ્યાર્થીઓને લઈ જઈ રહેલું એક મોટરસાયકલ લપસી જતાં રસ્તાની બાજુમાં આવેલા ખાડામાં પડી ગયું હતું. આ અકસ્માતમાં બે છોકરાઓના મૃત્યુ થયા છે, જ્યારે અન્ય ત્રણ વિદ્યાર્થીઓ ગંભીર રીતે ઘાયલ થયા છે.
પોલીસના જણાવ્યા અનુસાર, આ ઘટના સોમવારે વહેલી સવારે જવહાર તાલુકામાં બની હતી. પાંચ વિદ્યાર્થીઓ સરસુન ગામમાં નવરાત્રિની ઉજવણીમાં હાજરી આપવા માટે હિરાદપાડા ગગનગીરી આશ્રમ શાળામાંથી છૂપી રીતે બહાર નીકળી ગયા હતા.
આ ઘટના બાદ શાળાના આચાર્ય, વોર્ડન અને ચોકીદારને સસ્પેન્ડ કરવામાં આવ્યા હતા. જવાહર પોલીસ સ્ટેશનના એક અધિકારીએ જણાવ્યું હતું કે, પાંચ વિદ્યાર્થીઓ હોસ્ટેલમાંથી છૂપી રીતે બહાર નીકળી ગયા હતા અને એક જ મોટરસાઇકલ પર સાથે રવાના થયા હતા.
શાળાએ પરત ફરી રહ્યા હતા ત્યારે તેઓ જે મોટરસાયકલ પર સવાર હતા તે કોંગડી ઘાટ પાસે ગંભીર અકસ્માતનો ભોગ બની. આ અકસ્માતમાં સુમિત મોતીરામ ભિંગલ અને પ્રીતમ ગણેશ પોટિંદાના મૃત્યુ થયા, જ્યારે અન્ય ત્રણ વિદ્યાર્થીઓને ગંભીર ઈજાઓ પહોંચી. વધુ વાંચો: ભુજ તાલુકાની શ્રી નાનારેહા પ્રાથમિક શાળામાં વિદ્યાર્થીઓ અને શિક્ષકો દ્વારા નવરાત્રિની ઉજવણીઃ જુઓ વીડિયો
