ઘર બેઠા બનાવો હેલ્ધી અને ટેસ્ટી ઓટ્સ-પીનટ બટર હાઈ-પ્રોટીન બાર,જાણો રેસિપી

આજકાલ ફિટનેસ અને હેલ્ધી લાઈફસ્ટાઈલ પ્રત્યે લોકોમાં જાગૃતિ ખૂબ જ ઝડપથી વધી રહી છે. સ્વાસ્થ્યપ્રદ જીવનશૈલી અપનાવવા માટે મોટાભાગના લોકો ડાયેટમાં પ્રોટીનયુક્ત આહારને પ્રાધાન્ય આપી રહ્યા છે. આ દોડમાં ‘પ્રોટીન બાર’એ લોકોની પહેલી પસંદ બની ગઈ છે, જેને વર્કઆઉટ કરતા યુવાનોથી માંડીને હેલ્ધી સ્નેક્સના શોખીનો હોંશે-હોંશે ખાય છે.

જો કે, બજારમાં મળતા રેડીમેડ પ્રોટીન બારમાં ભારે માત્રામાં ખાંડ, પ્રિઝર્વેટિવ્સ અને હાનિકારક કેમિકલ્સ હોવાની પૂરી શક્યતા રહે છે, જે સ્વાસ્થ્ય માટે હાનિકારક સાબિત થઈ શકે છે. આ સમસ્યાનો શ્રેષ્ઠ વિકલ્પ એ છે કે તમે તેને બજારમાંથી લાવવાને બદલે ઘરે જ શુદ્ધ અને પૌષ્ટિક સામગ્રીથી તૈયાર કરો.

ઓટ્સ અને પીનટ બટરથી બનતો આ હાઈ-પ્રોટીન બાર સ્વાદમાં બેજોડ હોવાની સાથેસાથે પોષક તત્વોનો પણ ખજાનો છે. ઓટ્સમાં ભરપૂર માત્રામાં પ્રોટીન, ફાઈબર, આયર્ન, મેગ્નેશિયમ અને બીટા-ગ્લૂકન જેવા મહત્વના તત્વો રહેલા છે. જ્યારે પીનટ બટર હેલ્ધી ફેટ્સ, વિટામિન-ઈ અને મેગ્નેશિયમ પૂરૂ પાડે છે. આ બંનેનું મિશ્રણ લાંબા સમય સુધી પેટ ભરેલું રાખે છે અને શરીરને તુરંત ઊર્જા પ્રદાન કરે છે.

• ઓટ્સ અને પીનટ બટર હાઈ-પ્રોટીન બાર બનાવવાની સામગ્રી

1 કપ ઓટ્સ

અડધો કપ શુગર-ફ્રી પીનટ બટર

2 થી 3 મોટા ચમચી મધ

2 મોટા ચમચી ઝીણા સમારેલા બદામ અથવા અખરોટ

1 મોટો ચમચી કોળાના બીજ અથવા ચિયા સીડ્સ

ચપટી તજ પાવડર

• બનાવવાની સરળ રીત

સૌથી પહેલા એક કઢાઈમાં ઓટ્સને હળવા સોનેરી રંગના થાય ત્યાં સુધી સૂકા શેકી લો.  હવે એક મોટા બાઉલમાં પીનટ બટર અને મધને સારી રીતે મિક્સ કરી લો જેથી એકસમાન પેસ્ટ બની જાય. આ પેસ્ટમાં શેકેલા ઓટ્સ, ઝીણા સમારેલા ડ્રાયફ્રૂટ્સ અને બીજ ઉમેરીને બરાબર મિક્સ કરી લો. એક ટ્રે કે ડબ્બામાં બટર પેપર પાથરો. તૈયાર થયેલું મિશ્રણ તેમાં સરખી રીતે ફેલાવીને દબાવી દો, જેથી તે એકરસ થઈ જાય. આ ટ્રેને 1 થી 2 કલાક માટે ફ્રિજમાં સેટ થવા માટે મૂકી લો. સમય પૂરો થયા પછી તેને ફ્રિજમાંથી બહાર કાઢીને તમારા મનપસંદ આકાર (ચોરસ કે લંબચોરસ બાર) માં કાપી લો. તમારો હેલ્ધી, ફાઈબર અને હેલ્ધી ફેટ્સથી ભરપૂર હોમમેઇડ હાઈ-પ્રોટીન બાર તૈયાર છે, જે વર્કઆઉટ પછી બોડી રિકવરીમાં રામબાણ સાબિત થશે.

• હાઈ-પ્રોટીન બાર ખાવાની સાચી રીત અને સમય

સવારના નાસ્તામાં: સવારની ભાગદોડમાં જો નાસ્તો કરવાનો સમય ન હોય, તો આ પ્રોટીન બાર ઉત્તમ વિકલ્પ છે.

વર્કઆઉટ પહેલાં: જીમ કે કસરત કરવા જતાં પહેલાંના 30 થી 60 મિનિટ અગાઉ ખાવાથી શરીરમાં એનર્જી જળવાઈ રહે છે.

વર્કઆઉટ પછી: કસરત કર્યા બાદ સ્નાયુઓની રિકવરી માટે શરીરને પ્રોટીનની જરૂર પડે છે, ત્યારે આ બાર ખૂબ જ ફાયદાકારક છે.

ઓફિસ કે મુસાફરીમાં: કામની વચ્ચે કે સાંજના સમયે હળવી ભૂખ લાગે ત્યારે બહારનો જંક ફૂડ ખાવાને બદલે આ હેલ્ધી સ્નેક ખાઈ શકાય.