નવી દિલ્હી, 01 નવેમ્બર 2026: આજે, 1લી નવેમ્બરથી દેશમાં નાણાં, કરવેરા અને વહીવટને લગતા કેટલાક મહત્વપૂર્ણ ફેરફારો અમલમાં આવ્યા છે. આ ફેરફારોની અસર નાના વ્યવસાયના માલિકો, કરદાતાઓ, રોકાણકારો, પેન્શનધારકો અને મોબાઈલ ફોન વપરાશકર્તાઓ પર પડશે. જીએસટી (GST)ના નવા નિયમો હેઠળ, ઓનલાઈન માલ વેચતા નાના વ્યવસાયો માટે વિવિધ રાજ્યોમાં કામગીરી કરવી સરળ બનશે. નિર્ધારિત માપદંડો પૂર્ણ કરતા નાના વિક્રેતાઓએ હવે દરેક રાજ્યમાં અલગ ઓફિસ ખોલવાની જરૂર રહેશે નહીં.
આનાથી આશરે 9,50,000 નાના વ્યવસાય માલિકોને લાભ થવાની અપેક્ષા છે. વધુમાં, GST રિફંડની પ્રક્રિયા ઝડપી બનાવવામાં આવશે. અમુક શ્રેણીઓ માટે, રિફંડ આપમેળે મંજૂર થઈ શકે છે. ‘ઝીરો-રેટેડ’ સપ્લાય અને ‘ઇન્વર્ટેડ ડ્યુટી સ્ટ્રક્ચર’ (જ્યાં કાચા માલ પરનો કર તૈયાર માલ પરના કર કરતાં વધુ હોય છે) સાથે સંકળાયેલા કિસ્સાઓમાં, દાવો કરેલી રકમના 90 ટકા હંગામી ધોરણે ચૂકવી આપવામાં આવશે.
નવા નિયમો હેઠળ, માલના પુરવઠા પછી આપવામાં આવતી છૂટ (ડિસ્કાઉન્ટ) પરના GSTના સંદર્ભમાં વ્યવસાયોને વધુ રાહત મળશે. વધુમાં, હવે તમામ એસેટ મેનેજમેન્ટ કંપનીઓના ડિજિટલ રોકાણ પ્લેટફોર્મ પર ‘ડાયરેક્ટ પ્લાન્સ’ (direct plans) ડિફોલ્ટ વિકલ્પ તરીકે રહેશે. 80 વર્ષથી ઓછી ઉંમરના પેન્શનધારકો આજથી આ મહિનાની ૩૦ તારીખ સુધીમાં તેમનું વાર્ષિક જીવન પ્રમાણપત્ર (life certificate) જમા કરાવી શકે છે.
80 વર્ષ કે તેથી વધુ ઉંમરના પેન્શનધારકો માટે આ પ્રક્રિયા ગયા મહિને શરૂ થઈ હતી. દરમિયાન, ટેલિકોમ વિભાગે તમામ ટેલિકોમ કંપનીઓ માટે ‘કોલિંગ નેમ પ્રેઝન્ટેશન’ (CNAP) સેવા લાગુ કરવી ફરજિયાત બનાવી છે, જે આજથી અમલમાં આવશે. આ સુવિધાને કારણે, જ્યારે કોઈ કોલ આવશે ત્યારે કોલ કરનારના નંબરની સાથે તેમનું નામ પણ દેખાશે. આનાથી અજાણ્યા કોલ કરનારાઓની ઓળખ કરવામાં અને છેતરપિંડીભર્યા કોલ્સને રોકવામાં મદદ મળશે.
વધુ વાંચો: મોદી સરકારનો મોટો નિર્ણય! હવે દિલ્હીથી ગુવાહાટી સુધી દોડશે બુલેટ ટ્રેન, નોર્થ કોરિડોરને મંજૂરી
