નવી દિલ્હી, 25 સપ્ટેમ્બર 2026: વિદેશ મંત્રી ડૉ. એસ. જયશંકરે સંયુક્ત રાષ્ટ્ર મહાસભાના 81મા સત્ર દરમિયાન એસ્ટોનિયા, ઘાના, માલદીવ, બાર્બાડોસ અને ઈરાકના વિદેશ મંત્રીઓ સાથે મુલાકાત કરી હતી. આ બેઠકો દરમિયાન દ્વિપક્ષીય સંબંધો તેમજ પ્રાદેશિક અને વૈશ્વિક મુદ્દાઓ પર ચર્ચા કરવામાં આવી હતી. એસ્ટોનિયાના વિદેશ મંત્રી માર્ગુસ સાહકના સાથેની બેઠક મુખ્યત્વે યુક્રેન સંઘર્ષ અને તેની અસરો તેમજ બહુપક્ષીય સહયોગ પર કેન્દ્રિત હતી.
ઘાનાના વિદેશ મંત્રી સેમ્યુઅલ ઓકુડઝેટો અબ્લાકવા સાથે દ્વિપક્ષીય સંબંધોને મજબૂત કરવા તેમજ પ્રાદેશિક અને વૈશ્વિક મુદ્દાઓ પર ચર્ચા કરવામાં આવી હતી. આ દરમિયાન, માલદીવના વિદેશ મંત્રી દુન્યા મૌમૂન સાથે દ્વિપક્ષીય સંબંધો અને બહુપક્ષીય મંચો પર સહયોગ અંગે સમીક્ષા કરવામાં આવી હતી.
એસ. જયશંકરે બાર્બાડોસના વિદેશ મંત્રી ક્રિસ્ટોફર પીટર સિંકલર સાથે પણ મુલાકાત કરી હતી. દરમિયાન, ઇરાકના નાયબ વડાપ્રધાન અને વિદેશ મંત્રી ફુઆદ હુસૈન સાથેની બેઠક દરમિયાન પશ્ચિમ એશિયાની પરિસ્થિતિ તેમજ આર્થિક અને ઊર્જા ક્ષેત્રના સંબંધો અંગે ચર્ચા કરવામાં આવી હતી.
વધુ વાંચો: ભારતના નામે નવી સિદ્ધિ: 2032માં પુણે કરશે UCI રોડ વર્લ્ડ ચેમ્પિયનશિપની યજમાની
