મીરપુર, 16 માર્ચ 2026: બાંગ્લાદેશ સામેની વન-ડે સિરીઝમાં થયેલી કારમી હાર બાદ પાકિસ્તાન ક્રિકેટમાં ભૂકંપ સર્જાયો છે. મીરપુર ખાતે રમાયેલી ત્રીજી અને નિર્ણાયક મેચમાં બાંગ્લાદેશે પાકિસ્તાનને 11 રને હરાવીને સિરીઝ 2-1થી પોતાના નામે કરી લીધી છે. આ હાર બાદ પાકિસ્તાનના પૂર્વ વિકેટકીપર બેટ્સમેન કામરાન અકમલે પાકિસ્તાન ક્રિકેટ બોર્ડ (પીસીબી) અને ટીમના પ્રદર્શન પર આકરા પ્રહારો કર્યા છે.
પાકિસ્તાનની ટીમની સતત કથળતી હાલત પર ચિંતા વ્યક્ત કરતા કામરાન અકમલે કહ્યું કે, “ટીમની સ્થિતિ એટલી ખરાબ થઈ ગઈ છે કે હવે નેધરલેન્ડ જેવી ટીમ પણ પાકિસ્તાન સામે રમીને જીતવા ઈચ્છશે.” તેમણે પીસીબી ચેરમેન મોહસિન નકવીને આડે હાથ લેતા કટાક્ષ કર્યો કે, “જો ટીમ મેદાન પર મેચ જીતી શકતી નથી, તો શું હવે તમે આઈસીસી ટ્રોફી ચોરી કરીને ઘરે લાવશો?”
નિર્ણાયક મેચમાં 291 રનના લક્ષ્યનો પીછો કરવા ઉતરેલી પાકિસ્તાની ટીમ તરફથી સલમાન અલી આગાએ શાનદાર લડત આપી હતી. તેમણે 98 બોલમાં 106 રન ફટકાર્યા હતા, જે તેમના વન-ડે કરિયરની ત્રીજી સદી હતી. જોકે, અન્ય બેટ્સમેનોના નબળા સહકારને કારણે પાકિસ્તાનની આખી ટીમ છેલ્લા બોલે 279 રન બનાવીને ઓલઆઉટ થઈ ગઈ હતી. આ પહેલા ટોસ જીતીને બેટિંગ કરતા બાંગ્લાદેશે 50 ઓવરમાં 5 વિકેટ ગુમાવીને 290 રનનો મજબૂત સ્કોર બનાવ્યો હતો. બાંગ્લાદેશ તરફથી તંજીદ હસને તેના કરિયરની પ્રથમ વન-ડે સદી (107 રન) ફટકારી હતી. આ ઉપરાંત લિટન દાસે 41 રનનું મહત્વનું યોગદાન આપ્યું હતું.
બાંગ્લાદેશની જીતમાં બોલરોએ પણ મહત્વની ભૂમિકા ભજવી હતી. ફાસ્ટ બોલર તસ્કીન અહેમદે પાકિસ્તાની બેટિંગ લાઇન-અપના મૂળિયા હચમચાવી નાખ્યા હતા અને 4 મહત્વની વિકેટ ઝડપી હતી. મુસ્તફિઝુર રહેમાન અને નાહિદ રાણાએ પણ કિંમતી વિકેટો લઈને પાકિસ્તાનને લક્ષ્ય સુધી પહોંચતા અટકાવ્યું હતું. આ સિરીઝમાં પાકિસ્તાને ઘણા યુવા ખેલાડીઓને તક આપી હતી, પરંતુ ટીમનું પ્રદર્શન અત્યંત નિરાશાજનક રહ્યું હતું. શરૂઆતની વિકેટો ઝડપથી ગુમાવવાની આદત પાકિસ્તાનને ભારે પડી રહી છે. હવે આગામી મોટી ટૂર્નામેન્ટો પહેલા પાકિસ્તાન ક્રિકેટ બોર્ડ અને ટીમ મેનેજમેન્ટે આ હારનું મંથન કરવું પડશે, અન્યથા વૈશ્વિક સ્તરે પાકિસ્તાનનું ક્રિકેટ વધુ પછડાટ ખાઈ શકે છે.
