આર માધવનના દીકરાએ સ્વિમિંગ ચેમ્પિયનશિપમાં ભારત માટે પાંચ ગોલ્ડ મેડલ જીત્યા

મુંબઈ : એક્ટર આર માધવને સાઉથ સિનેમાથી લઈને બોલિવૂડ સુધી પોતાની ખાસ ઓળખ બનાવી છે. તે પોતાના દમદાર અભિનયથી દર્શકોના દિલ જીતી લે છે. અભિનેતાના પુત્રો પણ દિલ જીતવાની બાબતમાં ઓછા નથી, પરંતુ તેમના પુત્ર વેદાંતે અભિનય નહીં પરંતુ રમતગમતમાં શાનદાર પ્રદર્શન કરીને લોકોના દિલ જીત્યા છે અને દેશને ગૌરવ અપાવ્યું છે. આર માધવનના પુત્ર વેદાંતે દેશની સાથે તેના પિતાને પણ ગૌરવ અપાવ્યું છે. અભિનેતાને તેના પુત્ર પર ગર્વ છે, જેના વિશે તેણે સોશિયલ મીડિયા પર માહિતી આપી છે.

આર માધવનના પુત્ર વેદાંતે સ્વિમિંગ ચેમ્પિયનશિપમાં ભારત માટે પાંચ ગોલ્ડ મેડલ જીત્યા છે. આર માધવને તેના સોશિયલ મીડિયા એકાઉન્ટ ઇન્સ્ટાગ્રામ પર ઇવેન્ટમાંથી તેના પુત્રની કેટલીક તસવીરો શેર કરીને ખુશી વ્યક્ત કરી હતી. વેદાંતે આ સપ્તાહના અંતે મલેશિયા ઇન્વિટેશનલ એજ ગ્રુપ સ્વિમિંગ ચેમ્પિયનશિપમાં ભાગ લીધો હતો. તસવીરોમાં વેદાંત ભારતીય રાષ્ટ્રધ્વજ અને પાંચ ગોલ્ડ મેડલ સાથે પોઝ આપતો જોવા મળે છે. જ્યારે અન્ય એક તસવીરમાં તે તેની માતા સરિતા બિર્જે સાથે જોવા મળ્યો હતો.

આ તસવીરો શેર કરતાં આર માધવને કેપ્શનમાં લખ્યું, ‘ભગવાનની કૃપા અને તમારા બધાની  શુભકામના સાથે વેદાંત ભારત માટે પાંચ ગોલ્ડ (50 મીટર, 100 મીટર, 200 મીટર, 400 મીટર અને 1500 મીટરમાં) બે પીબી મેળવ્યા. આ ઇવેન્ટ આ અઠવાડિયે કુઆલાલંપુરમાં આયોજિત મલેશિયા ઇન્વિટેશનલ એજ ગ્રુપ સ્વિમિંગ ચેમ્પિયનશિપ્સ 2023નો ભાગ હતો. અમે ઉત્સાહિત છીએ અને પ્રદીપ સરના ખૂબ આભારી છીએ.