ભુજ, 26 ઓગસ્ટ, 2026: કચ્છમાં ભારતીય સૈન્ય યુનિફોર્મના ગેરકાયદે વેપાર કરનાર બે દુકાનો પર દરોડા પાડવામાં આવ્યા છે અને એ સંદર્ભે ત્રણ બદમાશો સામે ગુનો નોંધવામાં આવ્યો છે.
મીડિયા અહેવાલ અનુસાર મિલિટરી ઈન્ટેલિજન્સ અને ભુજ પોલીસની સંયુક્ત ટીમે કચ્છમાં આર્મીના યુનિફોર્મના ગેરકાયદે વેચાણ અને સંગ્રહ સામે સંયુક્ત ઓપરેશન હાથ ધર્યું છે, જેમાં ભુજ અને માધાપરમાં આવેલી બે આર્મી અને સ્પોર્ટ્સ સ્ટોર પર દરોડા પાડીને મોટા પ્રમાણમાં કોમ્બેટ યુનિફોર્મનું કાપડ ઝડપી પાડ્યું છે.
પોલીસ અને મિલિટરી ઈન્ટેલિજન્સને મળેલી બાતમીના આધારે ભુજ RTO સર્કલ પાસે આવેલી ઢાકા આર્મી જનરલ સ્ટોર અને માધાપરમાં આવેલી રાઘવ આર્મી એન્ડ સ્પોર્ટ્સ સ્ટોર પર આ દરોડા પાડવામાં આવ્યા હતા.
તપાસ દરમિયાન અધિકારીઓએ 128 મીટર કોમ્બેટ યુનિફોર્મનું કાપડ, 50 જોડી કોમ્બેટ ડ્રેસ, 280 આર્મી-સ્ટાઈલની ટોપીઓ અને 36 કોટ તથા જેકેટ જપ્ત કર્યા હતા.
Illegal Army Uniform Trade Busted in Kutch: Two Stores Raided, Three Bookedhttps://t.co/5P2soF6HNn pic.twitter.com/M74eMtY4tc
— DeshGujarat (@DeshGujarat) August 25, 2026
મોટા પ્રમાણમાં કોમ્બેટ યુનિફોર્મનું કાપડ અને તૈયાર કપડાં જપ્ત થવાથી ખુલ્લા બજારમાં આર્મી-પેટર્ન ધરાવતા યુનિફોર્મના અનધિકૃત સંગ્રહ અને વેચાણને લઈને ચિંતાઓ ઊભી થઈ છે.
જરૂરી મંજૂરી વગર આ મટિરિયલનો સંગ્રહ અને વેચાણ કરવામાં આવી રહ્યું હતું કે કેમ તે અંગે પોલીસ તપાસ કરી રહી છે. તપાસ એજન્સીઓ જપ્ત કરાયેલી વસ્તુઓના સ્રોત અને તે આ બે સ્ટોર સુધી કેવી રીતે પહોંચી તેની પણ તપાસ કરી રહી છે. પ્રાથમિક તપાસ દર્શાવે છે કે આ મટિરિયલ અનધિકૃત રીતે સંગ્રહિત કરવામાં આવ્યું હતું અને તેને અન્ય સ્થળે લઈ જવાની તૈયારી ચાલી રહી હતી.
કોણ છે સ્ટોરના માલિકો અને કેવી રીતે ઝડપાયા?
પોલીસે આ કેસના સંદર્ભમાં નથુસિંહ ઈરવરામ ઢાકા, કાનજી તેજા મહેશ્વરી અને દુકાનના માલિક તારાચંદ રામકુમાર શિવરાન સામે કાયદેસરની કાર્યવાહી શરૂ કરી છે. હેડ કોન્સ્ટેબલ વિક્રમસિંહ લક્ષ્મણસિંહ પરમાર દ્વારા નોંધાવવામાં આવેલી ફરિયાદના આધારે આગળની તપાસ હાથ ધરવામાં આવી હતી.
કચ્છ એ પાકિસ્તાન સાથે આંતરરાષ્ટ્રીય સરહદ ધરાવે છે અને સુરક્ષાની દ્રષ્ટિએ સંવેદનશીલ જિલ્લો માનવામાં આવે છે. તપાસ એજન્સીઓ જપ્ત કરાયેલા મટિરિયલનો સ્ત્રોત, તે કોને મોકલવાનું હતું અને શું તે આર્મીના યુનિફોર્મના અનધિકૃત સંગ્રહ અને વિતરણ સાથે જોડાયેલા કોઈ મોટા નેટવર્કનો ભાગ હતું કે કેમ તે અંગે તપાસ કરી રહી છે.
અધિકારીઓ એ શક્યતાની પણ તપાસ કરી રહ્યા છે કે આ યુનિફોર્મનો ઉપયોગ સૈન્ય કર્મચારીઓનું છદ્મરૂપ ધારણ કરવા (ઓળખ છુપાવવા) અથવા સુરક્ષા સંબંધિત અન્ય પ્રવૃત્તિઓને અંજામ આપવા માટે ગેરરીતિપૂર્વક થઈ શકતો હતો.
