મુંબઈ: બોલિવૂડ એક્ટર સલમાન ખાન છેલ્લા કેટલાક સમયથી ગુનેગારોના નિશાના પર છે. તેને ઘણી વખત જાનથી મારી નાખવાની ધમકી આપવામાં આવી છે. ફરી એકવાર સલમાનના નામે ધમકીભર્યો મેસેજ મોકલવામાં આવ્યો છે, જેના પછી મુંબઈ પોલીસ એલર્ટ મોડ પર આવી ગઈ છે. સૂત્રોના જણાવ્યા અનુસાર આ વખતે સલમાનને ફેસબુક પોસ્ટ દ્વારા ધમકી મળી છે. ધમકી બાદ મુંબઈ પોલીસે પણ સલમાનની સુરક્ષાની સમીક્ષા કરી છે.
સૂત્રોના જણાવ્યા અનુસાર રવિવારે સલમાન ખાનને એક સોશિયલ મીડિયા એકાઉન્ટ પરથી ધમકી મળી હતી જેના પર લોરેન્સ બિશ્નોઈનું નામ લખેલું છે. ધમકી આપનાર વ્યક્તિની પ્રોફાઇલ પર બિશ્નોઈની તસવીર પણ પોસ્ટ કરવામાં આવી છે. સલમાનને આપવામાં આવેલી આ ધમકીમાં તાજેતરમાં ગિપ્પી ગ્રેવાલ પર થયેલા હુમલા અને પંજાબી ગાયક સિદ્ધુ મૂઝવાલાની હત્યાનો પણ ઉલ્લેખ કરવામાં આવ્યો છે.
ફેસબુક પર આપવામાં આવેલી ધમકીમાં ગિપ્પી ગ્રેવાલને સંબોધીને લખવામાં આવ્યું છે કે – “તમે સલમાન ખાનને તમારો ભાઈ માનો છો, પરંતુ હવે સમય આવી ગયો છે કે તમારા ‘ભાઈ’ આવીને તમને બચાવે, આ સંદેશ સલમાન ખાન માટે પણ છે. એવા ભ્રમમાં ન રહો કે ડેવિડ તમને બચાવશે; તમને કોઈ બચાવી શકશે નહીં.અમે જોયું કે તમે સિદ્ધુ મૂઝવાલાના મૃત્યુ પર કેવી પ્રતિક્રિયા આપી. અમે બધા જાણીએ છીએ કે તે કેવો માણસ હતો અને તેના ગુનેગારો સાથેના જોડાણો, હવે તમે અમારા રડાર પર છો. તેને ટ્રેલર ગણો; સંપૂર્ણ ફિલ્મ ટૂંક સમયમાં રિલીઝ થશે. તમે ઈચ્છો તે કોઈપણ દેશમાં જઈ શકો છો, પરંતુ યાદ રાખો, મૃત્યુને વિઝાની જરૂર નથી; તે અનિવાર્યપણે આવે છે.”
સલમાનને આપવામાં આવેલી આ ધમકી બાદ મુંબઈ પોલીસે ફરી એકવાર સલમાન ખાનની સુરક્ષાનો તાગ મેળવ્યો છે. પોલીસે સલમાનને પણ એલર્ટ કરી દીધો છે. પોલીસે કહ્યું છે કે તેઓએ સોશિયલ મીડિયા પ્લેટફોર્મ પર પણ પત્ર લખીને પૂછ્યું છે કે આ પોસ્ટ ક્યાંથી આવી છે? પોલીસ એ જાણવાનો પ્રયાસ કરી રહી છે કે શું આ સોશિયલ મીડિયા એકાઉન્ટ બિશ્નોઈનું છે અને જો તેનું છે તો તેને કોણ હેન્ડલ કરી રહ્યું છે, કારણ કે બિશ્નોઈ જેલમાં છે.
