નવી દિલ્હી, 23 ઓક્ટોબર 2026: અમેરિકામાં નોકરી કરવાનું સ્વપ્ન જોતા ભારતીય યુવાનો અને ત્યાં કાર્યરત ભારતીય આઈટી કંપનીઓ માટે અમેરિકી સરકાર દ્વારા વીઝા નિયમોમાં કરવામાં આવી રહેલા કડક ફેરફારો ચિંતાનો વિષય બન્યા છે. અમેરિકી સરકારે વિદેશી કર્મચારીઓ સંબંધિત નિયમોમાં ભારે ચુસ્તતા આણવાની સાથે જ કેટલીક મોટી આઈટી કંપનીઓ સામે તપાસ અને કાર્યવાહી પણ શરૂ કરી છે. આ પરિસ્થિતિ વચ્ચે એવી આશંકાઓ સેવાઈ રહી હતી કે શું અમેરિકાના આ નિર્ણયોનું મુખ્ય નિશાન ભારતીય પ્રોફેશનલ્સ છે? જો કે, હાલમાં જ ભારત પ્રવાસે આવેલા અમેરિકી વિદેશ મંત્રી માર્કો રૂબિયોએ આ આશંકાઓને ફગાવી દેતા સ્પષ્ટતા કરી છે કે આ ફેરફારોનો ઉદ્દેશ્ય ભારતને ટાર્ગેટ કરવાનો નથી, પરંતુ અમેરિકી કર્મચારીઓ અને પોતાના દેશના હિતોને પ્રાથમિકતા આપવાનો છે.
અમેરિકી વિદેશ મંત્રી માર્કો રૂબિયોએ જણાવ્યું હતું કે, અમેરિકાની ઇમિગ્રેશન સિસ્ટમમાં લાંબા સમયથી કેટલીક ગંભીર ખામીઓ રહી છે. વિદેશી કર્મચારીઓને કામ માટે અમેરિકા બોલાવવાના કેટલાક કાર્યક્રમોમાં ગડબડ અને ખોટો ઉપયોગ થવાના કિસ્સાઓ સામે આવ્યા છે. અમેરિકી સરકારનું માનવું છે કે આ ખામીઓને દૂર કરવી અત્યંત જરૂરી છે. રૂબિયોએ સ્પષ્ટ કર્યું હતું કે સરકાર આ જ કારણોસર સુધારા કરી રહી છે અને તેનો હેતુ કોઈ ચોક્કસ દેશને નિશાન બનાવવાનો નથી.
તાજેતરમાં 9 ઓક્ટોબરે અમેરિકી શ્રમ વિભાગ દ્વારા ‘પર્મેનન્ટ લેબર સર્ટિફિકેશન પ્રોગ્રામ’ હેઠળ કેટલીક મોટી આઈટી કંપનીઓને સસ્પેન્ડ કરવામાં આવી હતી. જેમાં કોગ્નિઝન્ટ, ઇન્ફોસિસ, ટાટા કન્સલ્ટન્સી સર્વિસિસ, વિપ્રો, એચસીએલ અને કેપજેમિની જેવી ભારતીય અને વૈશ્વિક દિગ્ગજ કંપનીઓ સામેલ છે. આ ઉપરાંત માઇક્રોસોફ્ટ અને એડોબ જેવી અમેરિકી કંપનીઓ સામે પણ આ કાર્યવાહી કરવામાં આવી છે. શ્રમ વિભાગના જણાવ્યા મુજબ, આ કંપનીઓ સામે ફેડરલ તપાસ ચાલી રહી છે, જેમણે લાખો વિદેશી કર્મચારીઓ માટે એચ-1બી વીઝા અને કાયમી લેબર સર્ટિફિકેશન માટે અરજીઓ કરી હતી.
-
ગ્રીન કાર્ડ અને H-1B વીઝાનું ગણિત
અમેરિકામાં ‘ગ્રીન કાર્ડ’ મળવાથી કોઈપણ વિદેશી નાગરિકને ત્યાં કાયમી ધોરણે રહેવા અને કામ કરવાનો અધિકાર મળે છે, જેમાં કાયમી લેબર સર્ટિફિકેશન એક મહત્વપૂર્ણ તબક્કો છે. જ્યારે એચ-1બી વીઝાના માધ્યમથી અમેરિકી કંપનીઓ ખાસ ક્ષેત્રો માટે વિદેશી નિષ્ણાતોને નોકરી પર રાખે છે. ભારતીય આઈટી પ્રોફેશનલ્સ મોટા પ્રમાણમાં આ વીઝાનો ઉપયોગ કરે છે, જેના કારણે આ નિયમોમાં ફેરફારની સીધી અસર ભારતીય આઈટી વ્યાવસાયિકો પર પડી રહી છે.
માત્ર નોકરીયાતો જ નહીં, પરંતુ એફ-1 સ્ટુડન્ટ વીઝા પર અમેરિકા જતા વિદ્યાર્થીઓ માટે પણ યુ.એસ. ડિપાર્ટમેન્ટ ઓફ હોમલેન્ડ સિક્યોરિટી દ્વારા એક પ્રસ્તાવ મુકવામાં આવ્યો છે. અભ્યાસ દરમિયાન વ્યાવસાયિક અનુભવ મેળવવા માટેના ‘ઓપ્શનલ પ્રેક્ટિકલ ટ્રેનિંગ’ પ્રોગ્રામમાં સામેલ થવા માટે નવી ફી લાદવામાં આવી શકે છે. સરકારનો દાવો છે કે આ પગલું વીઝા વ્યવસ્થાને વધુ પારદર્શક બનાવશે અને સ્થાનિક કર્મચારીઓના હિતોનું રક્ષણ કરશે.
-
ટ્રમ્પ સરકારની નીતિ પર રૂબિયોની સ્પષ્ટતા
અમેરિકી વિદેશ મંત્રીએ રાષ્ટ્રપતિ ડોનાલ્ડ ટ્રમ્પની નીતિઓનો બચાવ કરતા કહ્યું, “જે રીતે ભારત સરકાર પોતાના નાગરિકો અને રાષ્ટ્રીય હિતોને પ્રાથમિકતા આપે છે, તેવી જ રીતે અમેરિકી સરકાર પણ પોતાના નાગરિકોને સૌથી પહેલા રાખશે. મને આશા છે કે દરેક એ વાત સમજશે કે રાષ્ટ્રપતિ ટ્રમ્પના નેતૃત્વમાં અમેરિકા પોતાના કર્મચારીઓ અને પોતાના દેશને જ પ્રાથમિકતા આપશે.”
અમેરિકાના આ વલણ સામે ભારતે પોતાનો પક્ષ મુકતા જણાવ્યું છે કે કુશળ પ્રોફેશનલ્સની આંતરરાષ્ટ્રીય અવરજવર બંને દેશો માટે પરસ્પર ફાયદાકારક છે. તેનાથી નવી ટેક્નોલોજી, સંશોધન, કાર્યક્ષમતા અને રોજગારની નવી તકો ઉભી થાય છે. ભારતે એ વાત પર પણ ભાર મૂક્યો છે કે અમેરિકી સરકારની હાલની જાહેરાતો બંને દેશો વચ્ચેના સહિયારા આર્થિક અને તકનીકી લક્ષ્યો સાથે સુસંગત નથી.
