T20 વિશ્વકપ: ભારતમાં રમવાનો ઈન્કાર કરનાર બાંગ્લાદેશને ICC એ આપ્યું અલ્ટીમેટમ
નવી દિલ્હી, 19 જાન્યુઆરી 2026: આઈપીએલમાંથી બાંગ્લાદેશી ખેલાડી મુસ્તાફિઝુર રહેમાનને દૂર કરવામાં આવતા ભારત-બાંગ્લાદેશ ક્રિકેટ વચ્ચે સંબંધ તંગ બન્યાં છે. તેમજ બાંગ્લાદેશે સુરક્ષાનુ કારણ આગળ ધરીને આગામી ટી20 વર્લ્ડકપ રમવા માટે ભારત આવવાનો ઈન્કાર કર્યો હતો. એટલું જ નહીં પાકિસ્તાને પણ બાંગ્લાદેશને પોતાનું સમર્થન આપ્યું હતું અને બાંગ્લાદેશની મેચ પોતાના દેશમાં રમાડવાની તૈયારીઓ દર્શાવી હતી. દરમિયાન આઈસીસીએ બાંગ્લાદેશ ક્રિકેટ બોર્ડને સ્પષ્ટ શબ્દોમાં કહ્યું છે કે, તેઓ ભારત વર્લ્ડ કપ આવશે કે કેમ તે અંગે 21મી જાન્યુઆરી સુધી જાણ કરે જેથી રિપલેશમેન્ટ અંગે નિર્ણય લઈ શકાય. આઈસીસીના આ નિર્ણયથી બાંગ્લાદેશ ક્રિકેટ બોર્ડ અને પાકિસ્તાન ક્રિકેટ બોર્ડમાં ખળભળાટ મચી ગયો છે.
સુત્રોના જણાવ્યા અનુસાર બાંગ્લાદેશ સુરક્ષાનું કારણ આગળ ધરીને વર્લ્ડકપમાં પોતાની મેચનુ વેન્યુ બદલવા માટે આઈસીસીને વિનંતી કરી હતી. આ પ્રકરણમાં હવે નવો વળાંક આવ્યો છે. આઈસીસીએ બાંગ્લાદેશ ક્રિકેટ બોર્ડને અલ્ટીમેટમ આપી દીધું છે.
રિપોર્ટ અનુસાર, આઈસીસીએ બીસીબીને કહ્યું છે કે, ટી20 વર્લ્ડકપમાં ભાગ લેવો છે કે કેમ તે અંગે 21મી જાન્યુઆરી સુધી જાણ કરે જેથી આગામી નિર્ણય લઈ શકાય. 17મી જાન્યુઆરીના રોજ આઈસીસીના અધિકારીઓ ઢાકા ગયા હતા અને બીસીબીના અધિકારીઓ સાથે મુલાકાત કરી હતી. જેમાં આ અલ્ટીમેટમ આપવામાં આવ્યું હોવાનું જાણવા મળે છે. મીટીંગ દરમિયાન બાંગ્લાદેશના અધિકારીઓ પોતાની મેચ ભારતમાં નહીં રમવા માટે મક્કમ રહ્યાં હતા.
અત્રે ઉલ્લેખનીય છે કે, આઈસીસીએ ટી20 વિશ્વકપને લઈને બાંગ્લાદેશને અલ્ટીમેટમ આપી દીધું છે. બીજી તરફ વર્લ્ડકપને લઈને ગણતરીના દિવસો જ બાકી રહ્યાં છે. તેમજ બીસીસીઆઈ દ્વારા તમામ તૈયારીઓ પૂર્ણ કરી લેવામાં આવી રહી છે. જો બાંગ્લાદેશ વિશ્વકપમાંથી હટી જશે તો તેની જગ્યાએ સ્કોટલેન્ડને સામેલ કરવામાં આવે તેવી શકયતા છે. બાંગ્લાદેશે આઈસીસી સમક્ષ અન્ય રજૂઆત કરી હતી કે, તેમની ટીમનું ગ્રુપ આયલેન્ડ સાથે બદલવામાં આવે. જેને પણ આઈસીસીએ ફગાવી દીધી છે.
