આજે ભારતીય વાયુસેનાને મળશે તેનું પહેલું ટ્વિન સીટર ટ્રેનર એરક્રાફ્ટ તેજસ,જાણો શું છે તેની ખાસિયત
દિલ્હી: ભારતનું સ્વદેશી ફાઇટર જેટ લાઇટ કોમ્બેટ એરક્રાફ્ટ તેજસ દરરોજ નવા રેકોર્ડ બનાવી રહ્યું છે. હવે તેનું ટ્રેનર વર્ઝન બેંગલુરુમાં ભારતીય વાયુસેનાને સોંપવામાં આવશે. તેજસનો નવો અવતાર ટેસ્ટ દરમિયાન તમામ માપદંડોને પૂર્ણ કરે છે. તેજસના નિર્માતા હિન્દુસ્તાન એરોનોટિક્સ લિમિટેડ (HAL)એ તેને એક સીમાચિહ્નરૂપ ગણાવ્યું છે.આ LCA ટ્રેનર એરક્રાફ્ટનું નામ LT-2501 રાખવામાં આવ્યું છે. તેને લીડ-ઇન ફાઇટર ટ્રેનર એટલે કે લિફ્ટ પણ કહેવામાં આવે છે. HAL બુધવારે બેંગલુરુમાં ભારતીય વાયુસેનાને ટ્વિન-સીટર ટ્રેનર LCA તેજસ એરક્રાફ્ટ સોંપશે. આ પ્રસંગે સંરક્ષણ રાજ્યમંત્રી અજય ભટ્ટ, વાયુસેનાના વડા એર ચીફ માર્શલ વીઆર ચૌધરી, એચએએલ ચીફ અનંતક્રિષ્નન ઉપસ્થિત રહેશે.
સંરક્ષણ અધિકારીઓના જણાવ્યા અનુસાર, એરફોર્સ અને HAL વચ્ચે 8 ટ્વિન સીટર તેજસ એરક્રાફ્ટ આપવા માટે કરાર કરવામાં આવ્યો છે. તેજસનું ટ્રેનર વર્ઝન બે સીટનું ટ્રેનર એરક્રાફ્ટ છે. તે HAL તેજસના તેજસ માર્ક 1 અને તેજસ માર્ક 1A ફાઈટર જેટ સાથેના ત્રણ પ્રોડક્ટ મોડલમાંથી એક છે. તેની લંબાઈ 13.2 મીટર, પહોળાઈ 8.2 મીટર અને ઊંચાઈ 4.4 મીટર છે. એરક્રાફ્ટની મહત્તમ ઝડપ મેક 1.6 છે. તે મહત્તમ 50,000 મીટરની ઉંચાઈ સુધી ઉડી શકે છે. તેમાં હથિયારો લઈ જવા માટે 9 હાર્ડ પોઈન્ટ છે.
ભારતીય વાયુસેના રૂ. 60,000 કરોડના ખર્ચે 84 સુખોઈ-30 એમકેઆઈ એરક્રાફ્ટને અપગ્રેડ કરવા અને 97 તેજસ માર્ક-1એ એરક્રાફ્ટ ખરીદવા માટે રૂ. 1.15 લાખ કરોડના સોદાને અંતિમ સ્વરૂપ આપવાની પ્રક્રિયામાં છે.એરફોર્સ ચીફ વી.આર. ચૌધરીએ મંગળવારે આ માહિતી આપી હતી. ફેબ્રુઆરી 2021 માં, સંરક્ષણ મંત્રાલયે વાયુસેના માટે 83 તેજસ MK-1A એરક્રાફ્ટ ખરીદવા માટે હિન્દુસ્તાન એરોનોટિક્સ લિમિટેડ (HAL) સાથે રૂ. 48,000 કરોડના સોદા પર હસ્તાક્ષર કર્યા હતા. 97 વધારાના તેજસ માર્ક-1એ એરક્રાફ્ટની ખરીદી બાદ વાયુસેનાના કાફલામાં આ વિમાનોની કુલ સંખ્યા વધીને 180 થઈ જશે.
8 ઑક્ટોબરે વાયુસેના દિવસ પહેલા એક પ્રેસ કોન્ફરન્સને સંબોધતા, વાયુસેનાના વડાએ એમ પણ કહ્યું હતું કે 84 સુખોઈ-30 MKI ફાઇટર એરક્રાફ્ટને 60,000 કરોડ રૂપિયાથી વધુના ખર્ચે અપગ્રેડ કરવાની દિશામાં કામ કરવામાં આવશે. સંરક્ષણ મંત્રાલય કુલ 156 લાઇટ કોમ્બેટ હેલિકોપ્ટર (LCH) ખરીદવા માટે આવતા વર્ષે HAL સાથે કરાર કરવા પર પણ વિચાર કરી રહ્યું છે, જેમાંથી 66 હેલિકોપ્ટર વાયુસેના માટે હશે.વાયુસેના પાસે હાલમાં 10 હળવા કોમ્બેટ હેલિકોપ્ટર છે.એરફોર્સના વડાએ જણાવ્યું હતું કે, “અમે 83 LCA-માર્ક 1A માટે કરાર પર હસ્તાક્ષર કર્યા હતા. અમે હવે 97 વધારાના એરક્રાફ્ટ ખરીદવાની પ્રક્રિયાના અંતિમ તબક્કામાં છીએ,” તેમણે કહ્યું કે આ કોન્ટ્રાક્ટની કિંમત 1.15 લાખ કરોડ રૂપિયાથી થોડી વધુ હશે.
