પાલનપુરઃ બનાસકાંઠા જિલ્લાના ડીસા તાલુકામાં લાંબા વિરામ બાદ વરસાદ પડ્યો હતો. આ દરમિયાન મોડીરાતે એક મહિલા પર વીજળી પડતાં તેનુ કરૂણ મોત નીપજ્યું હતું, મહિલાના મોત થતા બે માસૂમ દીકરીઓએ માતાની છત્રછાયા ગુમાવતા પરિવારમાં માતમ છવાયો હતો. ઘટના બાદ મહિલાનો મૃતદેહ પોસ્ટમોર્ટમ માટે હોસ્પિટલ ખસેડવામાં આવ્યો હતો.આ ઉપરાંત અમરેલી જિલ્લાના લીલીયા તાલુકાના ગુંદરણ ગામે પણ વીજળી પડતાં 42 વર્ષીય મહિલાનું મોત નીપજ્યું હતું.
બનાસકાંઠા જિલ્લાના ડીસામાં મોડી રાત્રે લાંબા વિરામ બાદ ગાજવીજ સાથે વરસાદ ખાબક્યો હતો. જેમાં ચંદ્રલોક સોસાયટી પાસે એક રહેણાંક મકાનમાં આકાશી વીજળી પડતા એક મહિલાનું મોત થયું હતું. વીજળી એટલા અવાજ સાથે પડી હતી કે આજુબાજુના ઘરના વાસણો પણ અભરાઈ પરથી નીચે પડી ગયા હતા. એટલું જ નહીં, દિવસ દરમિયાન ભારે ઉકળાટ બાદ મોડી રાત્રના સમયે ડીસામાં ગાજવીજ સાથે વરસાદ પડ્યો હતો.
આ દરમિયાન વિજાબેનના ઘર પર આકાશી વીજળી પડી હતી. ઝપેટમાં આવતા મહિલાનું પણ મોત થયું હતું. મહિલાનું મોત થતા બે દીકરીઓએ માતાની છત્રછાયા ગુમાવતા પરિવારમાં માતમ છવાયો હતો. મહિલાના મોતને પગલે આસપાસના ઘરોમાં પણ ભયનો માહોલ જોવા મળ્યો હતો. ગુજરાતમાં લાંબા વિરામ બાદ અમરેલી પંથકમાં પણ વરસાદનું આગમન થયું હતું. જો કે, જિલ્લાના અનેક વિસ્તારોમાં મેઘરાજાની પધરામણી થઈ હતી. આ દરમિયાન ગાજવીજ સાથે વરસાદ દરમિયાન લીલીયા તાલુકાના ગુંદરણ ગામમાં ખેતરમાં કામ કરતા વિમળાબેન અમરશીભાઈ ચુડાસમા ઉપર વીજળી પડતા તેમનું ઘટનાસ્થળે મોત નીપજ્યું હતું.
