દિલ્હી :દેશમાં કોરોનાના કેસોમાં સતત તેજી જોવા મળી રહી છે. રવિવારે જાહેર કરાયેલા આંકડા અનુસાર, ભારતમાં કોવિડ-19ના 5,357 નવા કેસ નોંધાયા છે. નવા કેસ આવ્યા બાદ ભારતમાં સક્રિય કેસની સંખ્યા વધીને 32,814 થઈ ગઈ છે. દિલ્હીની વાત કરીએ તો છેલ્લા 24 કલાકમાં રાજધાનીમાં કોરોનાના લગભગ 700 કેસ નોંધાયા છે. આ સાથે, સક્રિય કોરોના દર્દીઓની સંખ્યા અઢી હજારની નજીક પહોંચી ગઈ છે.
આરોગ્ય વિભાગ દ્વારા જાહેર કરવામાં આવેલા આંકડા અનુસાર, રાષ્ટ્રીય રાજધાનીમાં છેલ્લા 24 કલાક દરમિયાન કરવામાં આવેલા 3305 પરીક્ષણોમાં 699 દર્દીઓ કોવિડ પોઝિટિવ મળી આવ્યા છે. ચેપ દર વધીને 21.15% થઈ ગયો છે. આ દરમિયાન 4 દર્દીઓના મોત પણ થયા છે. હેલ્થ બુલેટિન અનુસાર, એક દર્દીનું કોરોનાથી મોત થયું છે, જ્યારે 3 દર્દીઓના મોતનું પ્રાથમિક કારણ કોરોના નથી. દિલ્હીમાં સક્રિય કોરોના દર્દીઓની સંખ્યા હવે વધીને 2460 થઈ ગઈ છે.
મહારાષ્ટ્રની વાત કરીએ તો રાજ્યમાં છેલ્લા 24 કલાકમાં કોવિડ-19ના 788 કેસ નોંધાયા છે. આ દરમિયાન એક દર્દીનું મોત પણ થયું છે. આ સાથે રાજ્યમાં કુલ દર્દીઓની સંખ્યા વધીને 4587 થઈ ગઈ છે. બીજી તરફ, મુંબઈ શહેરમાં રવિવારે 211 નવા કેસ નોંધાયા હતા, આ સતત છઠ્ઠો દિવસ છે, જ્યારે શહેરમાં 200 થી વધુ કેસ મળી આવ્યા છે. છેલ્લા 24 કલાકમાં 560 દર્દીઓને સાજા થયા બાદ હોસ્પિટલમાંથી રજા આપવામાં આવી છે. રાજ્યમાં કોવિડ-19નો મૃત્યુદર 1.82 ટકા છે, જ્યારે રિકવરી રેટ 98.12 ટકા છે.
હિમાચલ પ્રદેશમાં કોરોનાના 137 નવા કેસ નોંધાયા છે. આ દરમિયાન 4 લોકોના મોત પણ થયા છે. સક્રિય દર્દીઓની વાત કરીએ તો રાજ્યમાં કોરોનાના 1,764 કેસ છે. આરોગ્ય વિભાગના અધિકારીઓએ જણાવ્યું હતું કે રવિવારે શિમલામાં ત્રણ લોકોના મૃત્યુ થયા હતા, જ્યારે સિરમૌર જિલ્લામાં એક વ્યક્તિનું મોત થયું હતું. તેમણે કહ્યું કે મૃતકો તમામ 50-81 વર્ષની વયજૂથના પુરુષો હતા.
