દિલ્હી:ભારતીય જનતા પાર્ટી (BJP)ના રાષ્ટ્રીય અધ્યક્ષ જેપી નડ્ડા પાર્ટીની કમાન સંભાળ્યા બાદ નાગાલેન્ડની તેમની પ્રથમ મુલાકાતે ગુરુવારે કોહિમા પહોંચશે.સૂત્રોએ આ માહિતી આપી હતી. નાગાલેન્ડમાં આવતા વર્ષે માર્ચમાં વિધાનસભાની ચૂંટણી થવાની છે.
ભાજપના નાગાલેન્ડ એકમના મીડિયા સેલે બુધવારે જણાવ્યું હતું કે,નડ્ડા વોખા જિલ્લાના ઓલ્ડ રેફિમમાં એક જાહેર સભાને સંબોધિત કરશે.તે જ બપોરે કોહિમામાં ભાજપના નેતાઓને પણ સંબોધિત કરશે. પોલીસે જણાવ્યું કે,નડ્ડા શુક્રવારે સવારે દિલ્હી જવા રવાના થશે.
ભાજપ દાયકાઓ જૂની નાગા રાજકીય સમસ્યાના ઉકેલ માટે ચૂંટણી સૂત્ર સાથે 2018માં રાજ્યની ચૂંટણીમાં ઉતરી હતી.કેન્દ્રીય ગૃહમંત્રી અમિત શાહે 12 સપ્ટેમ્બરે નાગાલેન્ડ સરકારની નાગા રાજકીય મુદ્દાઓ પરની કોર કમિટી (NPI) ને NSCN (IM) ને અંતિમ કરાર પર હસ્તાક્ષર કરવા માટે રાજી કરવા જણાવ્યું હતું.
