પાકિસ્તાનના લાહોરમાં હવાના પ્રદુષણનું સ્તર વધ્યું, લોકોને માસ્ક પહેરીને બહાર નીકળવા અપીલ
નવી દિલ્હીઃ પાકિસ્તાનના પંજાબ પ્રાંતમાં, દેશના બીજા સૌથી મોટા શહેર લાહોરમાં ધુમ્મસ ખતરનાક સ્તરે વધી ગયું છે. પંજાબ પ્રાંતીય સરકારે લાહોર સહિત ત્રણ શહેરોમાં શાળાઓ, ઓફિસો, મોલ અને પાર્ક રવિવાર સુધી બંધ રાખવાનો આદેશ આપ્યો છે. છેલ્લા કેટલાક દિવસોમાં લાહોરનો એર ક્વોલિટી ઈન્ડેક્સ 400 ની આસપાસ છે. પંજાબમાં મેડિકલ સુવિધાઓ, કરિયાણાની દુકાનો અને ગેસ સ્ટેશન ખુલ્લા છે. સત્તાવાળાઓએ રહેવાસીઓને સલાહ આપી છે કે જો તેઓને બહાર જવું પડે તો માસ્ક પહેરે.
લાહોરના કેટલાક રહેવાસીઓએ અહેવાલ આપ્યો કે હાનિકારક વાતાવરણ વારંવાર થતું હોય છે જેણે તેમના સ્વાસ્થ્ય અને અન્ય દૈનિક પ્રવૃત્તિઓને ગંભીર અસર કરી છે. કેટલાક નિષ્ણાતો માને છે કે શિયાળાના વાવેતરની મોસમની તૈયારી માટે પાકના અવશેષોને બાળી નાખવું એ વાયુ પ્રદૂષણનું મુખ્ય કારણ છે.
ધુમ્મસ સામે લડવા માટે સરકારની નીતિઓ માત્ર ઉતાવળમાં બનાવવામાં આવે છે, જેનો કોઈ ફાયદો નથી. શિકાગો યુનિવર્સિટી દ્વારા ઉત્પાદિત એર ક્વોલિટી લાઈફ ઈન્ડેક્સ અનુસાર, લાહોર સહિત પાકિસ્તાનના સૌથી પ્રદૂષિત પ્રદેશોમાં વાયુ પ્રદૂષણ લોકોના જીવનને લગભગ સાત વર્ષ સુધી ટૂંકાવે છે.
એશિયામાં છેલ્લા કેટલાક સમયથી હવાનું પ્રદુષણ સતત વધી રહ્યું છે. જેથી ભારત, પાકિસ્તાન અને બાંગ્લાદેશ સહિતના દેશો ચિંતામાં મુકાયાં છે. ભારતમાં દિલ્હી, કોલકત્તા, પાકિસ્તાનમાં લાહોર અને બાંગ્લાદેશના ઢાકામાં પ્રદુષણના સ્તરમાં ચિંતાજનક રીતે વધારો થયો હતો. પ્રદુષણને ઘટાડવા માટે વિવિધ પગલા ભરવામાં આવી રહ્યાં છે. ભારતની રાજધાની દિલ્હીમાં પ્રદુષણના સ્તરમાં ઘટાડો થતા તંત્રએ રાહતનો શ્વાસ લીધો છે.
