ભારતના થિયેટરોમાં તાજેતરમાં જ હાઉસફુલ 5 રીલિઝ થઈ છે, આ ફિલ્મ હાલ સારી કમાણી કરી રહી છે. જેથી અક્ષય કુમાર સહિતના કલાકારોમાં ખુશી જોવા મળી રહી છે. આ ફિલ્મમાં સુપર સ્ટાર નાના પાટેકર પણ મહત્વના રોલમાં જોવા મળે છે. વર્ષોથી થિયેટર અને ફિલ્મ જગત સાથે જોડાયેલા નાના પાટેકરે અનેક સુપરહિટ ફિલ્મ આપી છે. જો કે, હાઉસફુલ-5 નાના પાટેકરના કરિયરની સૌથી વધારે કમાણી કરનારી ફિલ્મ બની હોવાનું જાણવા મળે છે.
તાજેતરમાં રિલીઝ થયેલી ‘હાઉસફુલ 5’માં 19 કલાકારોએ કામ કર્યું છે. અક્ષય કુમાર, અભિષેક બચ્ચન અને રિતેશ દેશમુખ ઉપરાંત, નાના પાટેકર પણ આ ફિલ્મમાં છે. આ ફિલ્મ નાના પાટેકર માટે સૌથી ખાસ બની છે. ‘હાઉસફુલ 5’ નાના પાટેકરના કરિયરની અત્યાર સુધીની સૌથી મોટી ફિલ્મ બની છે. તેમની કોઈ પણ ફિલ્મે ‘હાઉસફુલ 5’ જેટલી કમાણી કરી નથી. જો આપણે તેમની સૌથી વધુ કમાણી કરતી ફિલ્મો પર નજર કરીએ તો, ‘વેલકમ બેક’ એ 96.69 કરોડ રૂપિયા કમાયા. આ પછી, ‘રાજનીતિ’ એ 93.66 કરોડ રૂપિયા અને ‘વેલકમ’ એ 70.15 કરોડ રૂપિયા કમાયા. હવે ‘હાઉસફુલ 5’ એ આ બધી ફિલ્મોને પાછળ છોડી દીધી છે અને તેમના કરિયરની સૌથી વધુ કમાણી કરનાર ફિલ્મોની યાદીમાં પ્રથમ સ્થાન મેળવ્યું છે. ‘હાઉસફુલ 5’ હાલમાં થિયેટરોમાં છે અને તેનું કલેક્શન દરરોજ વધી રહ્યું છે. ટૂંક સમયમાં આ ફિલ્મ આ વર્ષની સૌથી વધુ કમાણી કરનારી ફિલ્મોમાં પણ સામેલ થશે.
