જમ્મુ-કાશ્મીરમાં સુરક્ષાના કારણોસર VPN પર પ્રતિબંધ મુકાયો
શ્રીનગર, 30 ડિસેમ્બર 2025: જમ્મુ-કાશ્મીરમાં રાષ્ટ્રીય સુરક્ષા અને જાહેર વ્યવસ્થા જાળવી રાખવા માટે વહીવટીતંત્ર દ્વારા મોટું પગલું ભરવામાં આવ્યું છે. કાશ્મીર ખીણના અનેક જિલ્લાઓમાં વર્ચ્યુઅલ પ્રાઇવેટ નેટવર્ક (VPN) ના ઉપયોગ પર સંપૂર્ણ પ્રતિબંધ લાદી દેવામાં આવ્યો છે. સુરક્ષા દળોએ હવે સેલ ફોન સર્વેલન્સ (મોબાઈલ પર દેખરેખ) વધારી દીધું છે જેથી પ્રતિબંધિત આદેશોનું ઉલ્લંઘન કરનારાઓને પકડી શકાય.
તાજેતરમાં જ કુપવાડા, કુલગામ અને શોપિયાં જિલ્લા મેજિસ્ટ્રેટ દ્વારા VPN પર પ્રતિબંધના નવા આદેશો જારી કરવામાં આવ્યા છે. કુપવાડાના મેજિસ્ટ્રેટ શ્રીકાંત બાલાસાહેબ સુસેએ જણાવ્યું હતું કે, પોલીસના અહેવાલો મુજબ જિલ્લામાં મોટી સંખ્યામાં શંકાસ્પદ ઈન્ટરનેટ યુઝર્સ દ્વારા VPN નો ઉપયોગ વધી રહ્યો છે, જે ચિંતાનો વિષય છે.
- કેમ લાદવામાં આવ્યો પ્રતિબંધ?
સરકારી આદેશમાં VPN ના જોખમો વિશે સ્પષ્ટતા કરવામાં આવી છે કે, VPN નો ઉપયોગ અશાંતિ ફેલાવવા અને ગેરમાર્ગે દોરનારી કે ભડકાઉ સામગ્રી ફેલાવવા માટે થઈ શકે છે. સાયબર ગુનેગારો અને દેશદ્રોહી તત્વો પોતાની ઓળખ છુપાવીને ગુનાહિત પ્રવૃત્તિઓનું સંકલન કરવા માટે VPN નો સહારો લે છે. સરકારે જે સામગ્રી પર રોક લગાવી છે, ત્યાં સુધી પહોંચવા માટે VPN નો દુરુપયોગ કરવામાં આવતો હોવાનું સામે આવ્યું છે.
- ઉલ્લંઘન કરનારાઓ પર કાયદાકીય કાર્યવાહી
જમ્મુ-કાશ્મીરના અનેક જિલ્લાઓમાં આ પ્રતિબંધ પહેલેથી જ અમલમાં છે. છેલ્લા એક મહિનામાં VPN નો ઉપયોગ કરવાના આરોપમાં 10 થી વધુ લોકો વિરુદ્ધ ગુનો નોંધવામાં આવ્યો છે. મેજિસ્ટ્રેટોએ પોલીસને સૂચના આપી છે કે સર્વેલન્સ તેજ કરવામાં આવે અને જે કોઈ વ્યક્તિ મોબાઈલમાં VPN વાપરતા પકડાય તેની સામે કડક કાયદાકીય પગલાં લેવામાં આવે.
નિષ્ણાતોના મતે, VPN ના દુરુપયોગથી રાષ્ટ્રીય સુરક્ષાને મોટો ખતરો પેદા થાય છે. સાયબર દુશ્મનો નેટવર્કમાં ઘૂસણખોરી કરવા કે ડેટા ચોરી જેવી પ્રવૃત્તિઓ છુપાવવા માટે પણ આ ટેકનોલોજીનો ઉપયોગ કરે છે. આથી જ, જાહેર વ્યવસ્થાને સુરક્ષિત રાખવા માટે વહીવટીતંત્ર દ્વારા આ અસ્થાયી પ્રતિબંધ લાદવાની ફરજ પડી છે.
આ પણ વાંચોઃહવે વકીલોએ સમયમર્યાદામાં પૂરી કરવી પડશે દલીલોઃ સુપ્રીમ કોર્ટ
