મોંઘવારીનો માર: ઘરેલૂ LPG સિલિન્ડરમાં રૂ. 60 અને કોમર્શિયલના ભાવમાં રૂ.115નો તોતિંગ વધારો
નવી દિલ્હી, 7 માર્ચ 2026: દેશની જનતા પર મોંઘવારીનો વધુ એક મોટો ફટકો પડ્યો છે. કેન્દ્ર સરકાર દ્વારા ઘરેલૂ રસોઈ ગેસની કિંમતોમાં 60 રૂપિયાનો વધારો કરવામાં આવ્યો છે. આ ભાવવધારા બાદ હવે દિલ્હીમાં 14.2 કિલોગ્રામના ઘરેલૂ ગેસ સિલિન્ડરની કિંમત 853 રૂપિયાથી વધીને 913 રૂપિયા થઈ ગઈ છે. માત્ર ઘરેલૂ જ નહીં, પરંતુ 19 કિલોગ્રામના કોમર્શિયલ ગેસ સિલિન્ડરના ભાવમાં પણ 115 રૂપિયાનો વધારો કરવામાં આવ્યો છે, જે હવે 1883 રૂપિયામાં મળશે. આ નવી કિંમતો આજથી એટલે કે 7 માર્ચથી અમલી બની છે.
આ અગાઉ સરકારે 8 એપ્રિલ 2025ના રોજ ઘરેલૂ ગેસ સિલિન્ડરની કિંમતમાં 50 રૂપિયાનો વધારો કર્યો હતો. એટલે કે લગભગ એક વર્ષના લાંબા સમયગાળા બાદ ફરી એકવાર ઘરેલૂ ગેસ મોંઘો થયો છે. બીજી તરફ, કોમર્શિયલ ગેસ સિલિન્ડરની કિંમતમાં હજુ થોડા દિવસો પહેલા જ એટલે કે 1 માર્ચ 2026ના રોજ અંદાજે 31 રૂપિયાનો વધારો કરવામાં આવ્યો હતો.
મધ્ય-પૂર્વના દેશોમાં વધી રહેલા તણાવને કારણે ગેસ સપ્લાય પ્રભાવિત થવાની આશંકા વચ્ચે આ ભાવવધારો કરવામાં આવ્યો છે. અમેરિકા, ઈઝરાયેલ અને ઈરાન વચ્ચે ચાલી રહેલા સંઘર્ષને કારણે વૈશ્વિક ઉર્જા બજારમાં ભારે અનિશ્ચિતતા જોવા મળી રહી છે. આ સંભવિત કટોકટીને ધ્યાનમાં રાખીને સરકારે 5 માર્ચના રોજ કટોકટીના અધિકારોનો ઉપયોગ કરીને દેશની તમામ ઓઈલ રિફાઈનરી કંપનીઓને એલપીજીનું ઉત્પાદન વધારવાનો આદેશ આપ્યો છે.
સરકારી આદેશ અનુસાર, હવે રિફાઈનરીઓએ પ્રોપેન અને બ્યુટેનનો મુખ્ય ઉપયોગ રસોઈ ગેસ તૈયાર કરવા માટે કરવાનો રહેશે. આ સાથે જ તમામ કંપનીઓને પ્રોપેન અને બ્યુટેનનો જથ્થો સરકારી તેલ કંપનીઓ જેવી કે ઇન્ડિયન ઓઇલ, હિન્દુસ્તાન પેટ્રોલિયમ અને ભારત પેટ્રોલિયમને આપવા માટે જણાવાયું છે. સરકારનો મુખ્ય ઉદ્દેશ્ય એ સુનિશ્ચિત કરવાનો છે કે યુદ્ધ જેવી સ્થિતિમાં પણ દેશના ગ્રાહકોને ગેસ સિલિન્ડરનો સપ્લાય કોઈ પણ અવરોધ વિના મળતો રહે.
આ પણ વાંચોઃ પોક્સોના ગુનાઓમાં આણંદ પોલીસની દાખલારૂપ કામગીરી: વધુ બે કેસના ગુનેગારોને આજીવન કેદની સજા
