નવી દિલ્હી, 21 ઓક્ટોબર 2026: પ્રધાનમંત્રી નરેન્દ્ર મોદી 31 ઓક્ટોબરે ગુજરાતના કેવડિયા ખાતે ‘રાષ્ટ્રીય એકતા દિવસ’ની ઉજવણીમાં ભાગ લેશે. આ કાર્યક્રમ સરદાર વલ્લભભાઈ પટેલની 151મી જન્મજયંતિ નિમિત્તે યોજવામાં આવશે. રાષ્ટ્રીય એકતા દિવસ, રાષ્ટ્રની એકતા અને અખંડિતતામાં સરદાર પટેલના યોગદાનને યાદ કરવા તથા ‘વિવિધતામાં એકતા’ની ભાવનાને પ્રોત્સાહન આપવા માટે ઉજવવામાં આવે છે. આ સમારોહમાં ભારતનો સમૃદ્ધ સાંસ્કૃતિક વારસો, પ્રેરણાદાયી પ્રસ્તુતિઓ, પોલીસ તથા કેન્દ્રીય સશસ્ત્ર પોલીસ દળોની શક્તિ અને શિસ્ત, તેમજ એક ભવ્ય પરેડના માધ્યમથી રાષ્ટ્રની એકતા, તાકાત અને વિવિધતાનું પ્રદર્શન કરવામાં આવશે.
આજે નવી દિલ્હીમાં એક પત્રકાર પરિષદને સંબોધતા, કેન્દ્રીય ગૃહ સચિવ ગોવિંદ મોહને જણાવ્યું હતું કે આ કાર્યક્રમમાં પોલીસ, કેન્દ્રીય સશસ્ત્ર પોલીસ દળો અને અન્ય કેન્દ્રીય પોલીસ સંગઠનોના ઉત્કૃષ્ટ કાર્યોને પ્રદર્શિત કરવામાં આવશે. ગૃહ સચિવ ગોવિંદ મોહને વધુમાં જણાવ્યું કે, આ પ્રસંગે પ્રધાનમંત્રી ‘એકતા દિવસ’ પરેડ નિહાળશે.
ગોવિંદ મોહને જણાવ્યું હતું કે આ વર્ષની ઉજવણીનું સૌથી મહત્વપૂર્ણ પાસું દેશમાં સશસ્ત્ર નક્સલવાદના અંતની ઉજવણી છે. તેમણે ઉલ્લેખ કર્યો કે પરેડમાં બોર્ડર સિક્યુરિટી ફોર્સ (BSF), સેન્ટ્રલ રિઝર્વ પોલીસ ફોર્સ (CRPF), સેન્ટ્રલ ઇન્ડસ્ટ્રિયલ સિક્યુરિટી ફોર્સ (CISF), ઇન્ડો-તિબેટન બોર્ડર પોલીસ (ITBP) અને સશસ્ત્ર સીમા બલ (SSB) ના દળોની સાથે વિવિધ રાજ્યોના પોલીસ દળો પણ સામેલ થશે. સશસ્ત્ર નક્સલવાદ સામેની લડાઈમાં આ દળોએ મહત્વપૂર્ણ ભૂમિકા ભજવી છે.
વધુ વાંચો: ટાઇગર શ્રોફ પર હુમલા માટે ટ્રેનમાં લવાયાં હતાં હથિયારો, બે મહિલા સહિત 4 વધુની ધરપકડ
