નવી દિલ્હી, 07 નવેમ્બર 2026: ઉત્તર-પૂર્વ ભારતની સુરક્ષા માટે આ ક્ષેત્રના વ્યૂહાત્મક મહત્વને ધ્યાનમાં રાખીને, સંરક્ષણ મંત્રી રાજનાથ સિંહે બાગડોગરા ખાતે તૈનાત વાયુસેનાના જવાનોને ઉચ્ચ સ્તરની સતર્કતા અને કાર્યકારી સજ્જતા જાળવી રાખવા અનુરોધ કર્યો છે.
આજે સિક્કિમ જવા રવાના થતા પહેલા, રાજનાથ સિંઘ સિલિગુડીના બાગડોગરા એરપોર્ટ પર વાયુસેનાના જવાનોને સંબોધિત કરી રહ્યા હતા.
તેમણે જણાવ્યું કે આધુનિક યુદ્ધનું સ્વરૂપ ઝડપથી બદલાઈ રહ્યું છે. યુદ્ધ હવે માત્ર સરહદો પર થતા પરંપરાગત સંઘર્ષો પૂરતું સીમિત નથી રહ્યું. સાયબર હુમલા, ડ્રોન હુમલા, પ્રોક્સી વોરફેર (પરોક્ષ યુદ્ધ) અને સોશિયલ મીડિયા દ્વારા ખોટી માહિતીનો ફેલાવો પણ સુરક્ષા માટેના મોટા પડકારો તરીકે ઉભરી આવ્યા છે.
રક્ષામંત્રીએ જણાવ્યું હતું કે આ નવા પડકારોનો સામનો કરવા માટે, લશ્કરી જવાનો નવી ટેકનોલોજીથી પરિચિત હોવા જોઈએ અને તેમની પાસે આધુનિક સાધનો હોવા જોઈએ. તેમણે ઉમેર્યું કે માત્ર આધુનિક ટેકનોલોજીના સહારે વિજય મેળવી શકાતો નથી; તેના માટે હિંમત, શિસ્ત, ઉચ્ચ મનોબળ અને જવાબદારીની ભાવના પણ જરૂરી છે.
રાજનાથ સિંહે સશસ્ત્ર દળો અને સ્થાનિક વસ્તી વચ્ચે સારા સંબંધો જાળવી રાખવાના મહત્વ પર પણ ભાર મૂક્યો હતો. તેમણે જણાવ્યું કે રાષ્ટ્રીય સુરક્ષા માટે સામાન્ય નાગરિકોનો સહકાર પણ અત્યંત મહત્વપૂર્ણ છે.
‘આત્મનિર્ભર ભારત’ના સંકલ્પનો ઉલ્લેખ કરતા તેમણે જણાવ્યું કે, ભારતીય સ્ટાર્ટઅપ્સ અને ઉદ્યોગો ડ્રોન, એન્ટી-ડ્રોન સિસ્ટમ્સ અને અન્ય આધુનિક સંરક્ષણ સાધનોના વિકાસમાં મહત્વપૂર્ણ યોગદાન આપી રહ્યા છે. ભવિષ્યના પડકારોનો સામનો કરવા માટે સશસ્ત્ર દળો પણ સ્વદેશી ટેકનોલોજી અને આધુનિક તાલીમ પદ્ધતિઓ અપનાવી રહ્યા છે.
રક્ષામંત્રીએ જણાવ્યું કે દરેક સફળ સૈન્ય અભિયાન પાછળ સમગ્ર ટીમનો સહયોગ, સમર્પણ અને ફરજ પ્રત્યેની પ્રતિબદ્ધતા રહેલી હોય છે. તેમણે ઉમેર્યું કે સમગ્ર રાષ્ટ્ર તેના સશસ્ત્ર દળોની સાથે મક્કમતાથી ઊભું છે.
વધુ વાંચો: કેન્દ્રીય મંત્રી કિરણ રિજિજુએ સાઉદી અરેબિયાની અલ રહમા મસ્જિદની મુલાકાત લીધી
