મનીલા, 17 નવેમ્બર 2026: ફિલિપાઇન્સની રાજધાની મનીલામાં યોજાયેલી ‘ક્વાડ’ દેશોની ઉચ્ચ સ્તરીય બેઠક દરમિયાન યુએસ રાષ્ટ્રપતિ ડોનાલ્ડ ટ્રમ્પે વડાપ્રધાન નરેન્દ્ર મોદીની મુક્તકંઠે પ્રશંસા કરી છે. પીએમ મોદીના વખાણ કરતા ટ્રમ્પે તેમને ‘ખૂબ જ ટફ મેન’ (ખડતલ અને મજબૂત વ્યક્તિત્વવાળા નેતા) ગણાવ્યા છે અને કહ્યું છે કે ભારત સાથે અમેરિકાના સંબંધો ખૂબ જ સારા રહ્યા છે.
ક્વાડ બેઠક દરમિયાન પીએમ મોદીની પ્રશંસા કરતા ટ્રમ્પે કહ્યું, “તેઓ (પીએમ મોદી) ખૂબ જ ટફ મેન છે. આ દેશો અને નેતાઓ સાથે અમારા સંબંધો શરૂઆતથી જ ખૂબ જ ઉત્તમ રહ્યા છે. હું લાંબા સમયથી આ તમામ નેતાઓ સાથે જોડાયેલો છું. આ બધા શાનદાર લોકો છે અને મારા મિત્રો છે, જેનાથી વૈશ્વિક કામોમાં ઘણી મદદ મળે છે.” ટ્રમ્પે એવો પણ દાવો કર્યો હતો કે અમેરિકા પાસે દુનિયાની સૌથી શક્તિશાળી સબમરીન છે અને આગામી 12 મહિનામાં દુનિયાને ચોંકાવી દે તેવા મોટા કાર્યો કરવામાં આવશે.
ક્વાડ સમૂહ (ભારત, અમેરિકા, જાપાન અને ઓસ્ટ્રેલિયા) ના મહત્વ વિશે વાત કરતા ટ્રમ્પે જણાવ્યું હતું કે આ વર્ષ આપણા માટે ખૂબ જ મહત્વપૂર્ણ રહ્યું છે. ક્વાડનું પુનરુદ્ધાર થયું છે, આપણો પરસ્પર સહયોગ વધ્યો છે અને મિત્રતા વધુ ગાઢ બની છે. આ દેશો સ્વતંત્ર, ખુલ્લા, સ્થિર અને અત્યંત સમૃદ્ધ હિંદ-પ્રશાંત ક્ષેત્રના ચાર મુખ્ય સ્તંભો છે. ટ્રમ્પે મોટી જાહેરાત કરતા જણાવ્યું કે, વર્ષ 2027માં ક્વાડ દેશોની વિશેષ આર્થિક બેઠકનું આયોજન કરવામાં આવશે. અમેરિકા આ સમૂહમાં મોટા પાયે રોકાણ કરશે અને સપ્લાય ચેઈનને વધુ મજબૂત બનાવવામાં આવશે.
અત્રે ઉલ્લેખનીય છે કે, મનીલામાં આસિયાન-ઇન્ડિયા સમિટની સાથેસાથે ક્વાડ દેશોની આ બેઠક યોજાઈ હતી, જેનો મુખ્ય ઉદ્દેશ્ય ક્ષેત્રીય સુરક્ષા, આર્થિક કूटનીતિ અને સંરક્ષણ સહયોગને વધુ મજબૂત કરવાનો છે.








