આગ્રામાં કાયદાના લીરેલીરા ઉડાડતા વાહનચાલકો સામે કાર્યવાહી, 654 વાહનોને નોટિસ

આગ્રા, 3 જુલાઈ 2026: ઉત્તર પ્રદેશના તાજનગરી આગ્રામાંથી ટ્રાફિક નિયમોના ઉલ્લંઘનનો એક અત્યંત ચોંકાવનારો અને અજીબોગરીબ કિસ્સો પ્રકાશમાં આવ્યો છે. અહીં એક વગદાર અને બેફામ બાઇક ચાલક પર ટ્રાફિક નિયમો તોડવા બદલ આશરે દોઢ લાખ રૂપિયાનો દંડ ફટકારવામાં આવ્યો છે, જ્યારે આશ્ચર્યની વાત એ છે કે તેની બાઇકની વર્તમાન બજાર કિંમત માત્ર 38,000 રૂપિયા છે. એટલે કે બાઇકની અસલી કિંમત કરતાં ચાર ગણો વધુ તો માત્ર ઓનલાઇન મેમો (ચલાણ) ફાટ્યો છે. આ ઘટના સ્પષ્ટ કરે છે કે રસ્તા પર લાગેલા સીસીટીવી કેમેરા તો પોતાની કામગીરી સતત કરી રહ્યા હતા, પરંતુ વાહનચાલક કોઈ પણ ડર વગર નિયમોના લીરેલીરા ઉડાડતો રહ્યો. હવે આવા રીઢા ગુનેગારો અને નિયમોનું ઉલ્લંઘન કરનારાઓ પર સિકંજો કસવા માટે વહીવટી તંત્રએ અત્યંત કડક વલણ અપનાવ્યું છે.

પ્રાપ્ત વિગતો અનુસાર, વર્ષ 2021 થી 2026 દરમિયાન આ દ્વિચક્રી વાહનના કુલ 156 ચલાણ કાપવામાં આવ્યા છે. આ તમામ દંડ શહેરના મુખ્ય ચાર રસ્તાઓ પર લાગેલા ઓટોમેટિક નંબર પ્લેટ રેકગ્નિશન કેમેરા દ્વારા ઓનલાઇન નોંધાયા છે. આ આધુનિક કેમેરા સ્થળ પર કોઈ પોલીસકર્મીની હાજરી વિના પણ રેડ લાઈટ જમ્પ કરવી, ઝેબ્રા ક્રોસિંગ પાર કરવું અને હેલ્મેટ વિના વાહન ચલાવવા જેવી ભૂલો પર સીધા પરિવહન વિભાગના સર્વરથી ચલાણ જનરેટ કરી દે છે. આગ્રાના એઆરટીઓ વિનય કુમાર સિંહે જણાવ્યું હતું કે, આ ચલાણ સંપૂર્ણપણે ડિજિટલ હોય છે અને વાહન માલિકના રજિસ્ટર્ડ મોબાઈલ નંબર પર માત્ર એક એસએમએસ મોકલવામાં આવે છે. ઘણા વગદાર કે નફ્ફટ વાહનચાલકો આ મેસેજને નજરઅંદાજ કરીને રસ્તા પર વાહનો દોડાવતા રહે છે. જ્યાં સુધી પોલીસ પ્રત્યક્ષ રીતે વાહન રોકીને તપાસ ન કરે, ત્યાં સુધી કેમેરા દર વખતે નિયમ તોડવા બદલ દંડ ઉમેરતા જાય છે.

• 654 વાહનોને નોટિસ: સીધી જ થશે FIR

આગ્રા જિલ્લામાં વારંવાર ટ્રાફિક નિયમો તોડનારા વાહનચાલકોની એક ‘બ્લેક લિસ્ટ’ તૈયાર કરવામાં આવી છે, જેના આંકડા પરિવહન વિભાગના અધિકારીઓને પણ ચોંકાવી રહ્યા છે. તંત્ર દ્વારા આવા 654 વાહનોને ચિહ્નિત કરીને તેમના વાહનનું રજિસ્ટ્રેશન રદ કરવાની અંતિમ નોટિસ મોકલી દેવામાં આવી છે. એઆરટીઓ પ્રશાસનના જણાવ્યા મુજબ, જો નિયત સમય મર્યાદામાં વાહન માલિકો બાકી દંડની રકમ નહીં ભરે, તો વાહનોનું રજિસ્ટ્રેશન કાયમ માટે બ્લોક કરી દેવાશે. આ કડક પગલાં પછી પણ જો વાહનો રસ્તા પર દોડતા જોવા મળશે, તો તેને જપ્ત કરવાની સાથે વાહન માલિકો સામે છેતરપિંડી અને કાયદાના ઉલ્લંઘનની ગંભીર કલમો હેઠળ સીધી એફઆઈઆર દાખલ કરવામાં આવશે.

• જૂની ગાડીની કિંમત કેવી રીતે નક્કી થાય છે?

પરિવહન વિભાગ કે પોલીસ વિભાગ કોઈ પણ જૂના વાહનની કિંમત મનસ્વી રીતે નક્કી કરતું નથી. આ માટે એક વૈજ્ઞાનિક અને કાનૂની પદ્ધતિ અપનાવવામાં આવે છે, જેને ‘ઇન્શ્યોર્ડ ડિકલેર્ડ વેલ્યુ’ (IDV) કહેવામાં આવે છે. શો-રૂમમાંથી બહાર નીકળ્યા પછી સમયની સાથે વાહનમાં થતા ઘસારાને કારણે તેની કિંમત ઘટતી જાય છે. ભારતીય કાયદા અનુસાર, વાહનની ઉંમરના આધારે તેની IDV નક્કી થાય છે, જેના હેઠળ જ આ પેશન પ્રો બાઇકની વેલ્યુ 38,000 રૂપિયા આંકવામાં આવી છે.

આગ્રા શહેરમાં ટ્રાફિક નિયમોના સૌથી વધુ ઉલ્લંઘન મામલે જે વાહનો ટોચ પર રહ્યા છે તેની યાદી પણ સામે આવી છે. સૌથી વધુ નિયમો તોડવામાં પેસન પ્રો બાઇક નંબર UP 80 VJ 6731 મોખરે છે, જેના નામે કુલ 156 ચલાણ નોંધાયા છે. ત્યારબાદ એક્સએલ-100 મોડલનું વાહન નંબર UP 80 EB 3584 કુલ 99 ચલાણ સાથે બીજા ક્રમે છે. સ્પ્લેન્ડર પ્રો બાઇક નંબર UP 80 CX 4012 પણ પાછળ નથી, તેના નામે 90 ચલાણ ફાટ્યા છે. આ ઉપરાંત એક્ટિવા વાહન નંબર UP 80 EC 2596 પર 76 ચલાણ, એક થ્રી-વ્હીલર વાહન નંબર UP 80 CT 8714 પર 71 ચલાણ, એક્ટિવા 5જી વાહન નંબર UP 80 EP 7492 પર 60 ચલાણ અને અન્ય એક એક્ટિવા 5જી વાહન નંબર UP 80 ES 9215 પર કુલ 56 ચલાણ ઓનલાઇન જનરેટ થયેલા છે. ટ્રાફિક વિભાગ હવે આ તમામ વાહનો જપ્ત કરવાની તૈયારીમાં છે.