અમદાવાદ, 20 ઓગસ્ટ 2026: ગુજરાતના ભાવનગરમાં ઝેરી દારૂના સેવનથી મૃત્યુઆંક વધીને સાત થયો છે. આ ઘટનાના સંબંધમાં સ્થાનિક પોલીસના ચાર કર્મચારીઓને સસ્પેન્ડ કરવામાં આવ્યા છે અને કેમિકલયુક્ત દારૂના ઉત્પાદન, વેચાણ તથા વિતરણ બદલ 21 આરોપીઓ સામે એફઆઈઆર (FIR) નોંધવામાં આવી છે.
ભાવનગરના પોલીસ અધિક્ષક (SP) નિતેશ પાંડેએ IANS ને જણાવ્યું કે આ ઘટનાના સંદર્ભમાં હાલમાં ઓછામાં ઓછા 25 થી 28 લોકો સારવાર લઈ રહ્યા છે અને સાત લોકોનાં મૃત્યુ થયાં છે.
ભાવનગરના ઘોઘા તાલુકામાં આવેલા ખરકડી ગામમાં ભેળસેળયુક્ત દારૂના સેવન અને વિતરણ અંગે ૧૯ ઓગસ્ટના રોજ વારતેજ પોલીસ સ્ટેશનમાં એફઆઈઆર (FIR) નોંધવામાં આવી હતી. આ એફઆઈઆરમાં ખરકડી, વારતેજ, ઉજ્જૈન (મધ્ય પ્રદેશ) અને ભાવનગર જિલ્લાના અન્ય વિસ્તારોના 21 આરોપીઓના નામનો ઉલ્લેખ છે. તેમની સામે ભારતીય ન્યાય સંહિતા અને ગુજરાત પ્રોહિબિશન એક્ટની વિવિધ જોગવાઈઓ હેઠળ કેસ નોંધવામાં આવ્યા છે.
ઉજ્જૈનથી લાવવામાં આવ્યો હતો દારૂ
એફઆઈઆર (FIR) મુજબ, આરોપીઓએ આર્થિક લાભ મેળવવા માટે કથિત રીતે રસાયણયુક્ત દારૂનું ઉત્પાદન કર્યું, તેમાં ભેળસેળ કરી અને તેનું વેચાણ કર્યું, જેનાથી ગ્રાહકોના જીવ જોખમમાં મુકાયા. પોલીસે જણાવ્યું હતું કે આ દારૂ ઉજ્જૈનથી લાવવામાં આવ્યો હતો અને ભાવનગર તથા આસપાસના વિસ્તારોમાં વિતરણ કરતા પહેલા તેમાં ભેળસેળ કરવામાં આવી હતી.
એફઆઈઆર (FIR) માં આ દારૂનો સંબંધ ‘રોયલ સ્ટેગ’ (Royal Stag) લેબલ ધરાવતી બોટલો સાથે જોડવામાં આવ્યો છે. તપાસકર્તાઓએ આક્ષેપ કર્યો છે કે આ નેટવર્કના વિવિધ સભ્યો દારૂની ખરીદી કરવા, ભેળસેળયુક્ત જથ્થો તૈયાર કરવા અને વિવિધ માધ્યમો દ્વારા તેનું વિતરણ કરવામાં સામેલ હતા.
વધુ વાંચો: મેરઠની એક મદ્રસામાંથી જૈશ-એ-મોહમ્મદના શંકાસ્પદ આતંકવાદીની ધરપકડ
