ડાંગ, 20 ઓગસ્ટ, 2026 – ભક્તિ અને સામુદાયિક એકતાના ભાવથી ઉજવાયેલા એક પાવન પ્રસંગમાં, શ્રી રામકૃષ્ણ નૉલેજ ફાઉન્ડેશન (SRKKF) તથા શ્રી રામકૃષ્ણ એક્સપોર્ટ્સ (SRK)ની સેવાકીય પહેલ શ્રી રામકૃષ્ણ વેલ્ફેર ટ્રસ્ટ દ્વારા 15મી અને 16મી ઓગસ્ટના રોજ ડાંગના 10 ગામોમાં વધુ 10 હનુમંત સંકલ્પ સેન્ટર(184થી 193)ના લોકાર્પણ મહોત્સવનું આયોજન કરવામાં આવ્યું હતું. આ સેન્ટરો મોટી કસાડ, પાટવિહિર, ભવાનદગડ, કુતરનાચ્યા, વાંગણ, વાવંદા, સતી, સેન્દ્રીઆંબા, મહાલપાડા અને ગડદ ગામોમાં નિર્માણ પામ્યાં છે. આ સાથે ડાંગમાં અત્યાર સુધીમાં 193 હનુમંત મંદિર તૈયાર થયાં છે.
આ પણ વાંચોઃ ધર્મો રક્ષતિ રક્ષિતઃ આ સૂત્રને ડાંગમાં ચરિતાર્થ કરવાનું બીડું ઝડપ્યું છે એક સંત અને એક ઉદ્યોગપતિએ
લોકાર્પણના આ પાવન પ્રસંગે માનવમંદિર, સાવરકુંડલાના પૂજ્ય શ્રી ભક્તિબાપુની પાવન ઉપસ્થિતિ રહી હતી. તેમની સાથે સ્ટીમહાઉસના ચેરમેન શ્રી સાંવરપ્રસાદ બુધિયા મુખ્ય અતિથિ તરીકે તથા દેવજી કન્સ્ટ્રક્શનના શ્રી ભરતભાઈ દેવજીભાઈ સુખડિયા વિશિષ્ટ અતિથિ તરીકે ઉપસ્થિત રહ્યા હતા. આ ઉપરાંત, SRK પરિવારના સભ્યો તેમજ ડાંગના ગ્રામજનોએ પણ ખૂબ જ ઉત્સાહ, શ્રદ્ધા અને ભાવનાત્મક જોડાણ સાથે આ પાવન મહોત્સવમાં સક્રિય સહભાગિતા નોંધાવી હતી.
આ હનુમંત સંકલ્પ સેન્ટરો માત્ર આધ્યાત્મિક સ્થાપત્ય નથી. તેઓ ભક્તિ, સેવા અને સહિયારા સંકલ્પના સશક્ત કેન્દ્રો છે. સામૂહિક ઉત્સવો, મૂલ્યઆધારિત શિક્ષણ, સાંસ્કૃતિક પરંપરાઓ અને સેવાભાવી પ્રવૃત્તિઓ દ્વારા આ સેન્ટરો સમાજને એકસાથે જોડે છે તથા સંવાદિતા, જવાબદારી અને આધ્યાત્મિક વિકાસના મૂલ્યોને પ્રેરણા આપે છે.
આ પણ વાંચોઃ ડાંગનો આદિવાસી સમાજ અને મંદિર નિર્માણના માર્ગે ધર્મ જાગરણ: Video
અત્યાર સુધીમાં કુલ 193 હનુમંત સંકલ્પ સેન્ટરોનું સફળતાપૂર્વક નિર્માણ પૂર્ણ થઈ ચૂક્યું છે, અને આગામી 2 વર્ષ દરમિયાન મોટા ભાગના સંકલ્પ સેન્ટરોના લોકાર્પણ મહોત્સવ પૂર્ણ કરવા માટેના પ્રયાસો સતત આગળ વધી રહ્યા છે.
હનુમંત સંકલ્પ સેન્ટરોના 4 સ્વરૂપો:
આ હનુમંત સંકલ્પ સેન્ટરો ચાર સુંદર સ્વરૂપોમાં નિર્માણ પામે છે:
- બાહુબલી: ભક્તિ અને શક્તિનું સશક્ત પ્રતીક.
- મહાબલી: સેવા અને સમર્પણ ભાવનું પ્રતીક.
- મારુતિ: નમ્રતા, લઘુતા અને નિષ્ઠાનું પ્રતીક.
- મહાવીર: સામુદાયિક એકતા અને શાશ્વત મૂલ્યોનું પ્રતિનિધિત્વ.
સંકલ્પ સેન્ટરના નિર્માણમાં યોગદાન આપનાર દરેક વ્યક્તિ કે સંસ્થા તેમજ શ્રી રામકૃષ્ણ વેલ્ફેર ટ્રસ્ટ પ્રત્યે કૃતજ્ઞતાના પ્રતીકરૂપે સંબંધિત મંદિર પરિસરમાં તેમના યોગદાનને સન્માનપૂર્વક સ્થાન આપવામાં આવે છે.
આ પણ વાંચોઃ ડાંગમાં હનુમાનજીના 311 મંદિરના નિર્માણ પછી દેશભરમાં 1111 મંદિરનો સંકલ્પ
લોકાર્પણ મહોત્સવ પૂર્ણ થયા બાદ સંબંધિત ગામના ગ્રામજનો આ સંકલ્પ સેન્ટરની જવાબદારી સંભાળે છે. અહીં દરરોજ ભજન અને કીર્તનના પાવન સ્વરો ગુંજી ઊઠે છે અને સમગ્ર ડાંગ જિલ્લામાં સંસ્કૃતિ તથા સંસ્કારનું જતન કરતાં ભક્તિ, સેવાભાવ અને સદાચારની દિવ્ય ઊર્જાને સતત પ્રજ્વલિત રાખે છે.
કેવી રીતે મળી આ માટેની પ્રેરણા?
સુપ્રસિદ્ધ ઉદ્યોગપતિ અને રાજ્યસભાના સાંસદ શ્રી ગોવિંદભાઈ ધોળકિયાનું ટ્રસ્ટ એસઆરકે નોલેજ ફાઉન્ડેશન તથા શ્રીરામકૃષ્ણ વેલફેર ટ્રસ્ટ ઘણાં વર્ષથી ગરીબો માટે મેડિકલ કૅમ્પનું આયોજન કરી રહ્યું છે. 2017માં આવા એક કૅમ્પ દરમિયાન ડાંગ પ્રયોષા પ્રતિષ્ઠાનના સ્થાપક પરમ પૂજ્ય પી.પી. સ્વામી સાથે ડાંગના ગ્રામ્ય વિસ્તારોની મુલાકાત દરમિયાન એક વૃક્ષની નીચે ખુલ્લામાં હનુમાનજીની મૂર્તિ જોવા મળી. ગોવિંદભાઈએ તેમની સાથે મુસાફરી કરી રહેલા પી.પી. સ્વામીને એ વિશે પૂછ્યું. સ્વામીજીએ કહ્યું કે ડાંગના દરેક ગામમાં આ જ સ્થિતિ છે. આ રીતે ખુલ્લામાં મૂકાયેલી મૂર્તિઓની જ ગ્રામજનો પૂજાવિધિ કરે છે.
આ વાતચીત દરમિયાન બંને મહાનુભાવ એ વાતે સંમત થયા કે, આ સ્થિતિ યોગ્ય નથી, મંદિર તો હોવું જ જોઈએ. અને એ જ ક્ષણે શ્રી ધોળકિયા દ્વારા ડાંગમાં 311 હનુમાનજી મંદિર બનાવવાનો સંકલ્પ લેવામાં આવ્યો.
આ માટે જમીન મેળવવાની અને મંદિર નિર્માણની કામગીરી શરૂ થઈ. આ દરમિયાન ગોવિંદભાઈને લાગ્યું કે, આ યજ્ઞમાં અન્ય લોકોને પણ જોડવા જોઈએ જેથી તે એક લાંબાગાળાનો ટકાઉ પ્રકલ્પ બની રહે. અને બન્યું પણ એવું. તેમની પ્રેરણાથી અન્ય લોકો પણ જોડાતા ગયા.
ડાંગમાં બની રહેલા હનુમાન મંદિરોની વિશેષતાઃ
પી.પી. સ્વામીજીની પ્રેરણા તથા ગોવિંદભાઈ ધોળકિયાના પ્રયાસોથી બની રહેલા આ મંદિરોની વિશેષતા એ છે કે, આ માત્ર હનુમાનજીનાં મંદિર નથી, પરંતુ દરેક મંદિરની સાથે કૉમ્યુનિટી હૉલ (સામુદાયિક હૉલ) પણ બનાવવામાં આવે છે જ્યાં એક સાથે 200-300 લોકો બેસી શકે, જ્યાં ધાર્મિક-સાંસ્કૃતિક પ્રવૃત્તિઓ થઈ શકે. અને એ રીતે ગ્રામજનો સંગઠિત રહીને વિકાસ કરી શકે.
 તથા શ્રી રામકૃષ્ણ){kind=link}