નાયબ સીએમ સુનેત્રા પવાર બારામતી વિધાનસભા બેઠક જીતી ગયાં
મુંબઈ, 4 મે, 2026 – નાયબ સીએમ સુનેત્રા પવાર બારામતી વિધાનસભા બેઠક જીતી ગયાં છે. દેશના પાંચ રાજ્યમાં વિધાનસભા ચૂંટણી ઉપરાંત ગુજરાત, મહારાષ્ટ્ર સહિત અન્યત્ર યોજાયેલી પેટા ચૂંટણીનાં પરિણામ જાહેર થઈ રહ્યાં છે.
મહારાષ્ટ્રની બારામતી વિધાનસભા બેઠક પર યોજાયેલી પેટાચૂંટણીમાં રાષ્ટ્રવાદી કોંગ્રેસ પાર્ટી (NCP) ચીફ અને ડેપ્યુટી સીએમ સુનેત્રા પવારે ભવ્ય જીત મેળવી છે. જીત નિશ્ચિત થતા જ સુનેત્રા પવાર ખૂબ જ ભાવુક થઈ ગયા હતા અને તેમણે પોતાની આ સફળતા સ્વર્ગીય અજિત પવારને સમર્પિત કરી હતી. તેમણે કહ્યું કે અજિત દાદા વિના આ તેમની પહેલી ચૂંટણી હતી અને તેમણે ક્યારેય સપનામાં પણ વિચાર્યું નહોતું કે તેમને આ રીતે ચૂંટણીના મેદાનમાં ઉતરવું પડશે. તેમના જણાવ્યા મુજબ, બારામતીની જનતાએ જે ભારે મતદાન કર્યું છે તે જ અજિત દાદા માટે તેમની સાચી શ્રદ્ધાંજલિ છે.
વિકાસનો સંકલ્પ
પોતાની જીત બાદ બારામતીની જનતાનો આભાર માનતા સુનેત્રા પવારે કહ્યું કે બારામતી તેમના માટે માત્ર એક મતવિસ્તાર નથી પરંતુ તેમનો પોતાનો પરિવાર છે. તેમણે સંકલ્પ લીધો કે તેઓ પોતાના લોકોની સેવામાં હંમેશા તત્પર રહેશે અને વિકાસ કાર્યો દ્વારા અજિત પવારના અધૂરા સપનાઓને સાકાર કરશે. ડેપ્યુટી સીએમએ લોકોને ખાતરી આપી હતી કે તેઓ આ વિસ્તારની પ્રગતિ માટે પૂરી મહેનતથી કામ કરતા રહેશે. જીતની લીડ વચ્ચે તેમણે જનતાને શાંતિ જાળવવા અને સાથે મળીને ચાલવાની મોટી અપીલ પણ કરી હતી.
बारामती विधानसभा पोटनिवडणुकीत मला भरघोस मतांनी विजयी केल्याबद्दल तमाम मायबाप बारामतीकरांचे मनःपूर्वक आभार.आपण दाखवलेला विश्वास, प्रेम आणि पाठिंबा माझ्यासाठी अत्यंत मोलाचा आहे.
आदरणीय अजितदादांच्या पश्चात झालेली बारामतीची ही पहिलीच निवडणूक होती.त्यांच्या मार्गदर्शनाची आणि… pic.twitter.com/XRv49EWMy3
— Sunetra Ajit Pawar (@SunetraA_Pawar) May 4, 2026
શરદ પવાર અને સુપ્રિયા સુલે માટે શું કહ્યું?
સુનેત્રા પવારે આ પ્રસંગે કાકા શરદ પવાર અને સુપ્રિયા સુલેના ભરપૂર વખાણ કરીને સૌને ચોંકાવી દીધા હતા. એનસીપી ચીફએ જણાવ્યું કે શરૂઆતમાં શરદ પવારે કહ્યું હતું કે તેઓ કોઈ ઉમેદવાર નહીં ઉતારે, જેને તેઓ એક મોટા સમર્થન તરીકે જુએ છે. તેમણે સ્વીકાર્યું કે અત્યાર સુધી સુપ્રિયા સુલે અને પવાર પરિવારે જનતા વચ્ચે જે પ્રકારનો વિશ્વાસ અને સેવાનો ભાવ કાયમ કર્યો છે તે કાબિલે તારીફ છે. સુનેત્રાએ વચન આપ્યું હતું કે તેઓ પરિવારના આ વારસા અને જનસેવાની પરંપરાને આગળ વધારવા માટે પૂરો પ્રયત્ન કરશે.
PM મોદીને અભિનંદન
ચૂંટણીના પરિણામો દરમિયાન સુનેત્રા પવારે બંગાળ અને આસામમાં ભાજપની લીડ બદલ વડાપ્રધાન નરેન્દ્ર મોદીને ખાસ અભિનંદન પાઠવ્યા હતા. તેમણે કહ્યું કે આ પરિણામોથી ફરી એકવાર જનતાનો ભરોસો સામે આવ્યો છે જે પીએમ મોદીના નેતૃત્વને દર્શાવે છે. બીજી તરફ, મમતા બેનર્જી દ્વારા ચૂંટણી પંચ પર લગાવવામાં આવેલા આરોપો પર તેમણે ખૂબ જ સંતુલિત પ્રતિક્રિયા આપી હતી. સુનેત્રાએ કહ્યું કે દરેક વ્યક્તિનો વસ્તુઓને જોવાનો પોતાનો દૃષ્ટિકોણ હોય છે અને તેઓ આ પ્રકારના વિવાદાસ્પદ નિવેદનો પર કોઈ ટિપ્પણી કરવાનું પસંદ નહીં કરે.
