અમદાવાદ, 27 જૂન 2026: નશીલા પદાર્થોની હેરફેર (ડ્રગ ટ્રાફિકિંગ) ને રોકવા અને માદક પદાર્થોના સપ્લાય નેટવર્કને નેસ્તનાબૂદ કરવા માટેના પોતાના સતત પ્રયાસોના ભાગરૂપે, ડિરેક્ટોરેટ ઓફ રેવન્યુ ઇન્ટેલિજન્સ (DRI) એ સુરતમાં 2 કિલો કોકેન જપ્ત કર્યું છે અને એનડીપીએસ (NDPS) એક્ટ, 1985 ની સંબંધિત જોગવાઈઓ હેઠળ આ ગેરકાયદેસર હેરફેરમાં સામેલ એક વ્યક્તિની ધરપકડ કરી છે.
આ જપ્તી ઉપરાંત, ડીઆરઆઈ (DRI) એ મુંબઈ, દિલ્હી, જયપુર, પટના, કોચિન અને અમદાવાદમાં વિવિધ એરપોર્ટ, રેલવે સ્ટેશનો, કુરિયર ટર્મિનલ્સ અને હાઇવે પર શ્રેણીબદ્ધ કામગીરી હાથ ધરી છે અને ગયા મહિનાથી અત્યાર સુધીમાં સામૂહિક રીતે અંદાજે 26 કિલો કોકેન જપ્ત કર્યું છે. આ કામગીરી દરમિયાન 14 વિદેશી નાગરિકો સહિત 22 વ્યક્તિઓની ધરપકડ કરવામાં આવી હતી.આ પ્રતિબંધિત સામગ્રીની હેરફેર વિવિધ મોડસ ઓપરેન્ડી દ્વારા કરવામાં આવી હતી, જેમ કે ઇન્જેશન (શરીરની અંદર છુપાવવા માટે ડ્રગ્સથી ભરેલા કેપ્સ્યુલ્સ અથવા પેલેટ્સ ગળી જવા), ઘરગથ્થુ અને ખાદ્ય ચીજોમાં છુપાવવું, કાપડ-કપડાના ટુકડાને તેમાં પલાળવા, સામાન (બેગેજ) માં છુપાવવું વગેરે.
આયોજિત અને સંકલિત કામગીરી દ્વારા, ડીઆરઆઈ (DRI) એ માદક દ્રવ્યો અને સાયકોટ્રોપિક પદાર્થોની હેરફેરમાં સંકળાયેલા સંગઠિત સિન્ડિકેટ્સને સતત નિશાન બનાવ્યા છે, જે ભારત સરકારના ‘નશા મુક્ત ભારત’ ના વિઝનમાં પોતાનું યોગદાન આપી રહ્યા છે.દર વર્ષે, 26 જૂનને આંતરરાષ્ટ્રીય નશાખોરી અને ગેરકાયદેસર હેરફેર વિરોધી દિવસ (ઇન્ટરનેશનલ ડે અગેન્સ્ટ ડ્રગ એબ્યુઝ એન્ડ ઇલિસિટ ટ્રાફિકિંગ) તરીકે ઉજવવામાં આવે છે. સંયુક્ત રાષ્ટ્ર (યુનાઇટેડ નેશન્સ) દ્વારા 1987 માં સ્થાપિત આ દિવસ વૈશ્વિક પ્રવૃત્તિઓને મજબૂત કરવા, નશીલા પદાર્થોના સેવનની વિનાશક અસરો વિશે જાગૃતિ લાવવા અને ગેરકાયદેસર ડ્રગ્સના વેપાર સામે લડવા માટે આંતરરાષ્ટ્રીય સ્તરે સમર્પિત છે.
