હૈદરાબાદ, 20 જુલાઈ 2026: વિદેશમાં સુંદર ભવિષ્ય અને ઊંચી કમાણીની લાલચ આપીને નિર્દોષ લોકોને ઠગાઈ અને શોષણની જાળમાં ફસાવવાનો વધુ એક ગંભીર કિસ્સો સામે આવ્યો છે. હૈદરાબાદની રહેવાસી શબનમ બેગમ નામની મહિલા ઓમાનના મસ્કતમાં ગંભીર શોષણનો ભોગ બની છે. ઓમાનથી શબનમનો એક કરુણ વિડીયો સામે આવ્યા બાદ ભારતમાં ભારે ચકચાર મચી ગઈ છે અને પીડિત મહિલાએ ભારત સરકાર પાસે સહીસલામત સ્વદેશ પાછા લાવવા માટે મદદની વિનંતી કરી છે.
મળતી માહિતી મુજબ, હૈદરાબાદની રહેવાસી શબનમ બેગમને સ્થાનિક એજન્ટ દ્વારા ૨૬ માર્ચ ૨૦૨૬ના રોજ ઓમાનના મસ્કત મોકલવામાં આવી હતી. તેમને ત્યાં હાઉસમેડ (ઘરકામ)ની નોકરી અને દર મહિને 200 ઓમાની રિયાલ (લગભગ રૂ. 50000) પગારનું વચન આપવામાં આવ્યું હતું. પરંતુ મસ્કત પહોંચતા જ સ્થિતિ તદ્દન બદલાઈ ગઈ હતી.
શબનમ બેગમે આક્ષેપ કર્યો છે કે તેમને અલગ-અલગ ઘરોમાં સતત 12 થી 15 કલાક સુધી મજૂરી કરવા મજબૂર કરવામાં આવતી હતી. છેલ્લા ત્રણ મહિનાથી વધુ સમયથી એક પણ રૂપિયો પગાર આપવામાં આવ્યો ન હતો. આ ઉપરાંત, પૂરતું ખાવાનું કે રહેવાની યોગ્ય વ્યવસ્થા પણ આપવામાં આવતી નહોતી. પીડિતાનો મોબાઈલ ફોન પણ ઝૂંટવી લેવામાં આવ્યો હતો જેથી તે કોઈનો સંપર્ક ન કરી શકે. તેમની સાથે અમાનવીય વ્યવહાર અને મારપીટ પણ કરવામાં આવી હતી.
-
રાજકીય નેતાને વિડીયો મોકલી માંગી મદદ
કોઈપણ રીતે તક મળતા શબનમે એક વિડીયો રેકોર્ડ કરીને હૈદરાબાદના ‘મજલિસ બચાઓ તહરીક’ના નેતા અમજદ ઉલ્લાહ ખાનને મોકલ્યો હતો. આ વિડીયો વાયરલ થતાં સમગ્ર મામલો પ્રકાશનમાં આવ્યો હતો. ત્યારબાદ તક જોઈને શબનમ માલિકના ઘરેથી ભાગીને મસ્કત સ્થિત ભારતીય દૂતાવાસ પહોંચી હતી અને આશ્રય લીધો હતો. પીડિતાના પરિવારે વિદેશ મંત્રી એસ. જયશંકરને અપીલ કરી છે કે શબનમને તાત્કાલિક અને સુરક્ષિત રીતે ભારત પાછી લાવવામાં આવે. ભારતીય દૂતાવાસે પણ આ મામલે સક્રિયતા દાખવીને જરૂરી કાનૂની કાર્યવાહી શરૂ કરી હોવાની માહિતી આપી છે. નેતા અમજદ ઉલ્લાહે ખોટા વચનો આપી મહિલાને ઓમાન મોકલનાર એજન્ટ સામે પણ સખત કાનૂની પગલાં ભરવાની માગ કરી છે.
