અમદાવાદઃ ગુજરાતમાં વીજળીના સ્માર્ટ વીજ મીટર સામે લોકોનો વિરોધ વધતો જાય છે. રાજકોટ, વડોદરા, સુરત વગેરે શહેરોમાં વિરોધ બાદ હવે અમદાવાદના નવા નરોડા વિસ્તારમાં પણ લોકોએ સ્માર્ટ મીટરો લગાવવા સામે વિરોધ કર્યો છે. નવા નરોડામાં આવેલી 8 જેટલી સોસાયટીના રહીશોએ સ્માર્ટ મીટરને લઈને ઉગ્ર વિરોધ નોંધાવ્યો હતો. સ્થાનિક લોકોએ એક્ઠા થઈને સ્માર્ટ મીટર દૂર કરીને જૂના મીટર લગાવવાની માંગ કરી હતી.. તેમજ વીજ કંપનીઓએ જાણ કર્યા વગર જ સ્માર્ટ મીટર લગાવી દીધાનો આક્ષેપ કર્યો છે.
ગુજરાતમાં જ્યાં જ્યાં વીજળીના સ્માર્ટ મીટર મૂકવામાં આવ્યા છે ત્યાં વધુ વીજ બિલ આવતું હોવાની વ્યાપક ફરિયાદો ઉઠી છે. ત્યારે હવે અમદાવાદમાં પણ સ્માર્ટ મીટરને લઈને ભારે વિરોધ શરુ થઈ ગયો છે. સરકાર અને વીજ કંપનીઓ સ્માર્ટ મીટરો લગાવવા માટે મક્કમ છે. અને સ્માર્ટ મીટરની સાથે જુના મીટરો લગાવીને લોકોને સમજાવવામાં આવી રહ્યા છે. જ્યારે લોકો પણ સ્માર્ટ મીટરો નહીં લગાવવા માટે મક્કમ છે. અગાઉ રાજ્યભરમાં અનેક શહેરોમાં ઠેર-ઠેર દેખાવ થયા છે. ત્યારે હવે અમદાવાદમાં પણ હવે સ્માર્ટ મીટરને લઈને વિરોધ શરુ થઈ ગયો છે. શહેરના નવા નરોડા વિસ્તારમાં આવેલી 8 જેટલી સોસાયટીના રહીશોએ સ્માર્ટ મીટરને લઈને ઉગ્ર વિરોધ નોંધાવ્યો હતો. સ્થાનિક લોકોએ એક્ઠા થઈને સ્માર્ટ મીટર દૂર કરીને જૂના મીટર લગાવવાની માંગ કરી હતી. તેમજ વીજ કંપનીઓએ જાણ કર્યા વગર જ સ્માર્ટ મીટર લગાવી દીધાનો આક્ષેપ કર્યો હતો.
રાજ્યભરના વિવિધ શહેરોમાં સ્માર્ટ વીજ મીટર લગાવવાનું વીજ નિગમ દ્વારા શરૂ કરાયું છે. આવા સ્માર્ટ વિજ મીટરમાં વીજ બિલ ત્રણ ગણું આવતું હોવાના આક્ષેપ સાથે સ્થાનિક વીજ મીટર ધારકો દ્વારા વિરોધ શરૂ થયો છે. બે દિવસ પહેલા સુરતમાં વીજ કંપની દ્વારા સ્માર્ટ મીટર લગાવવાની કામગીરી સામે લોકોનો વિરોધ નોંધાવ્યો હતો. આ મુદ્દે સુરત પાલિકાના વિપક્ષે શાસક પક્ષના કોર્પોરેટરોને ઘેરવાનો પ્રયાસ કર્યો હતો. વડોદરામાં પણ સ્માર્ટ મીટર સામે લોકોએ ભારે વિરોધ કર્યો હતો. સુરેન્દ્રનગર અને રાજકોટમાં પણ વિરોધ કરાયો છે.
