રાજકોટઃ શહેરમાં મ્યુનિ. કોર્પોરેશન દ્વારા ટોયઝ લાયબ્રેરી શરૂ કરવામાં આવી છે. તેને સારોએવો પ્રતિસાદ મળી રહ્યો છે. મધ્યમ અને ગરીબ વર્ગના પરિવારોના વાલીઓ પોતાના બાળકો માટે મોંઘાદાટ રમકડાં ખરીદી શકતા નથી. આથી નજીવા ભાડાના દરે રમકડાં આપવા માટે ટોયઝ લાયબ્રેરી શરૂ કરવામાં આવી છે. ટોય લાઈબ્રેરી માટે 2થી 13 વર્ષના બાળકો માટે મેમ્બરશીપ આપવામાં આવે છે. જેમાં દર મહિને 20 રૂપિયાનું લવાજમ ભરવાનું હોય છે.
રાજકોટ શહેરની શાળાઓમાં હાલ ઉનાળાનું વેકેશન ચાલી રહ્યું છે. મોટાભાગનો સમય બાળકો રમવામાં પસાર કરતા હોય છે. આકરા તાપમાં બાળકો ઘરની બહાર રમવા નીકળી ન શકતા હોવાથી મોબાઇલની હેબીટ થઈ જતી હોય છે. જોકે મોબાઇલની આદતમાંથી બાળકો મુક્ત થાય અને એક્ટિવિટી તરફ વળે તે માટે શહેરમાં મ્યુનિ.કોર્પોરેશન સંચાલિત લાઈબ્રેરીઓમાં રમકડાંનો વિભાગ કાર્યરત કરાયો છે. આ ટોયઝ લાઈબ્રેરી શહેરના સાધુવાસવાણી રોડ, કેનાલ રોડ અને શ્રોફ રોડ પર આવેલી છે. જ્યાં બાળકોને મનગમતા રમકડા ભાડા પર આપવામાં આવે છે. રમકડા માટે એક મહિનાની મેમ્બરશીપના 20 રૂપિયા રાખવામાં આવ્યા છે. જેથી દરેક માતા-પિતાને આ રકમ પોસાય તેવી છે.
આરએમસીના સૂત્રોએ જમાવ્યું હતું કે, શહેરમાં મ્યુનિ. સંચાલિત રમકડાની 4 લાઈબ્રેરી કાર્યરત છે.શહેરમાં સૌથી પહેલી રમકડાની લાઈબ્રેરી 1988-89માં શરૂ કરવામાં આવી હતી. આજે રમકડાની 4 લાઈબ્રેરી કાર્યરત છે. ટોય લાઈબ્રેરી માટે 2થી 13 વર્ષના બાળકો માટે મેમ્બરશીપ આપવામાં આવે છે. જેમાં દર મહિને 20 રૂપિયાનું લવાજમ ભરવાનું હોય છે. જ્યારે બાળકો પહેલી વખત મેમ્બરશીપ લે ત્યારે 280 રૂપિયા ચુકવવા પડે છે. જેમાં 60 રૂપિયા લવાજમના, 15 રૂપિયા દાખલ ફી, 5 રૂપિયા ફોર્મ ફી અને 200 રૂપિયા ડિપોઝિટના છે. 200 રૂપિયા જે ડિપોઝિટના આપવામાં આવ્યા હોય છે .એ પૈસા જ્યારે બાળકો ખાતુ બંધ કરાવે ત્યારે તેમને પાછા આપવામાં આવે છે. એટલે કે દર મહિને 20 રૂપિયા ભરવાના હોય છે. ટોયઝ લાયબ્રેરીમાં ગેમ્સ, પઝલ્સ સહિતના રમકડા હોય છે. જેનાથી બાળકો રમી શકે.આ સાથે જ એજ્યુકેશનના ઉદેશથી એજ્યુકેશનલ ટોયઝ અને પઝલ્સ પણ રાખવામાં આવી છે.જેથી બાળકો તેનો ઉપયોગ કરી શકે છે. દર અઠવાડિયે બાળકને નવુ રમકડુ મળી શકે તે હેતુથી આ લાઈબ્રેરી ચલાવવામાં આવી રહી છે. રમકડાની સાથે સાથે વિવિધ પુસ્તકો, અંગ્રેજી, ગુજરાતી અને હિન્દી ભાષામાં ઉપલબ્ધ છે. જેથી બાળકો રમવાની સાથે થોડો સામાન્ય નોલેજ અને અભ્યાસ પર પણ ધ્યાન આપી શકે.
સૂત્રોએ ઉમેર્યું હતું કે, રાજકોટમાં આવેલી ચારેય લાઈબ્રેરીમાં કુલ 9થી 10 હજાર જેટલા રમકડા છે.મેમ્બરશીપ લીધી હોય તેમાંથી 1200થી 1300 મેમ્બર રેગ્યુલ છે. આ રમકડાનો લાભ દરરોજ 40થી 50 બાળકો લેતા હોય છે.એમાં પણ વેકેશન શરૂ થાય એટલે આ સંખ્યા વધી જાય છે.
