સ્વતંત્રતા પર્વ: ગુજરાત સહિત સમગ્ર દેશના 1380 પોલીસ કર્મચારીઓને મેડલથી સન્માનિત કરાશે
દિલ્હીઃ આવતીકાલે દેશમાં 75માં સ્વતંત્રતા પર્વની ધામધૂમથી ઉજવણી કરવામાં આવશે. દરમિયાન સમગ્ર દેશમાંથી 1380 જેટલા પોલીસ કર્મચારીઓને શૌર્ય અને વિશિષ્ટ સેવા બદલ પોલીસ મેડલથી સન્માનિત કરવામાં આવશે. આ પોલીસ કર્મચારીઓ પૈકી બે પોલીસ કર્મચારીઓને તેમની બહાદુરી માટે રાષ્ટ્રપતિ પોલીસ મેડલ અને 628 પોલીસ કર્મચારીઓને પોલીસ મેડલ આપવામાં આવશે. વિશિષ્ટ સેવા માટે 88 પોલીસ કર્મચારીઓને રાષ્ટ્રપતિ પોલીસ મેડલ અ 662 પોલીસ કર્મચારીઓને સરાહનીય કામગીરી અંગે પોલીસ મેડલથી સન્માનિત કરવામાં આવશે.
જમ્મુ-કાશ્મીર પોલીસના એસઆઈ અમરદીપ અને સીઆરપીએફ જવાન સુનીલ દત્તાત્રેયને મરણોપરાંત સન્માનિત કરાશે. જમ્મુ-કાશ્મીરના 275 પોલીસ કર્મચારીઓને તેમની વીરતા અને સેવા માટે મેડલથી સન્માનિત કરવામાં આવશે. આ ઉપરાંત સીઆરપીએફના 150, આઈટીબીપીના 23, ઓડીશાના 67, મહારાષ્ટ્રના 25, છત્તીસગઢના 21 અને ગુજરાતના 17 પોલીસ કર્મચારીઓનું પણ સન્માન કરવામાં આવશે.
ભારત- તિબેટ સીમા પોલીસના 20 જવાનોને મે-જૂનમાં પૂર્વ લદ્દાખની ઘર્ષણોમાં બહાદુરી માટે સમ્માનિત કરવામાં આવ્યા હતા. 15 જૂન 2020 ના રોજ ગલવાન ખીણમાં 8 કર્મચારીઓને બહાદુરી, ઉચ્ચ સ્તરની વ્યૂહરચના એટલે કે રણનીતિ, વ્યૂહાત્મક સૂઝ અને માતૃભૂમિની રક્ષા માટે PMG થી સન્માનિત આવ્યા છે. 18 મે, 2020 ના રોજ ફિંગર 4 વિસ્તારમાં થયેલી અથડામણ દરમિયાન 6 જવાનોને બહાદુરી માટે PMGથી સન્માનિત કરવામાં આવ્યા છે. 18 મે, 2020 ના રોજ, 6 જવાનોને લદ્દાખમાં હોટ સ્પ્રિંગ્સ નજીક બહાદુરીપૂર્વકનું શૌર્ય દેખાડવા માટે PMGથી સન્માનિત કરવામાં આવ્યા, આ ઉપરાંત 3 જવાનોને છત્તીસગઢમાં નક્સલ વિરોધી કામગીરીમાં હિંમત, ધૈર્ય અને નિશ્ચય દર્શાવવા માટે PMGથી સન્માનિત કરવામાં આવ્યા છે.
(Photo-File)
