નવી દિલ્હી, 2 નવેમ્બર 2026: વર્ષ 2026ના પુરુષ ‘રાઇઝિંગ સ્ટાર્સ એશિયા કપ’માટે ભારતીય ક્રિકેટ નિયંત્રણ બોર્ડ દ્વારા ‘ઇન્ડિયા-એ’ટીમની અધિકૃત જાહેરાત કરી દેવામાં આવી છે. આ આગામી પ્રતિષ્ઠિત ટૂર્નામેન્ટનું આયોજન કતારની રાજધાની દોહા ખાતે આગામી 19 થી 29 નવેમ્બર 2026 દરમિયાન કરવામાં આવશે. યુવા પ્રતિભાઓથી સજ્જ આ ટીમની આગેવાની યુવા બેટ્સમેન તિલક વર્માને સોંપવામાં આવી છે, જ્યારે અનુભવી ખેલાડી રજત પાટીદારને ટીમના ઉપકપ્તાન બનાવવામાં આવ્યા છે. આ ઉપરાંત ટીમમાં યુવા સનસનાટી વૈભવ સૂર્યવંશી અને વિસ્ફોટક ઓપનર અભિષેક શર્માને પણ સ્થાન મળ્યું છે.
આગામી ટૂર્નામેન્ટ માટે ભારત-એ ટીમને ‘ગ્રુપ-બી’માં રાખવામાં આવી છે, જેમાં યુનાઈટેડ આરબ અમીરાત, નેપાળ અને પરંપરાગત હરીફ પાકિસ્તાન-એનો સમાવેશ થાય છે. જ્યારે ‘ગ્રુપ-એ’માં બાંગ્લાદેશ-એ, શ્રીલંકા-એ, અફઘાનિસ્તાન-એ અને હોંગકોંગને સ્થાન આપવામાં આવ્યું છે. બંને ગ્રુપમાંથી ટોચની બે-બે ટીમો સેમિફાઇનલ માટે ક્વોલિફાય કરશે.
ભારતીય ટીમ પોતાના અભિયાનની શરૂઆત 20 નવેમ્બરે નેપાળ સામે રમીને કરશે. ત્યારબાદ ક્રિકેટ ચાહકો જેની આતુરતાથી રાહ જોઈ રહ્યા છે તે ભારત અને પાકિસ્તાન વચ્ચેનો હાઈ-વોલ્ટેજ મુકાબલો 22 નવેમ્બરે વેસ્ટ એન્ડ પાર્ક ઇન્ટરનેશનલ સ્ટેડિયમ ખાતે રમાશે. આ બંને મુકાબલા વેસ્ટ એન્ડ પાર્ક સ્ટેડિયમમાં જ યોજાશે. ત્યારબાદ, ગ્રુપ તબક્કાના અંતિમ મેચમાં 24 નવેમ્બરે ભારત-એનો મુકાબલો UAE સામે દોહા સાયન્સ એન્ડ ટેકનોલોજી યુનિવર્સિટીના મેદાન પર થશે. ટૂર્નામેન્ટની સેમિફાઇનલ મેચો 26 અને 27 નવેમ્બરે રમાશે, જ્યારે ફાઇનલ રવિવાર, 29 નવેમ્બરના રોજ યોજાશે.
-
રાઇઝિંગ સ્ટાર્સ એશિયા કપ માટે ભારત-એ ની સંયુક્ત ટીમ
તિલક વર્મા (કપ્તાન), રજત પાટીદાર (ઉપકપ્તાન), અભિષેક શર્મા, વૈભવ સૂર્યવંશી, પ્રભસિમરણ સિંહ (વિકેટકીપર), રિંકુ સિંહ, કુમાર કુશાગ્ર (વિકેટકીપર), સૂર્યાંશ શેડગે, શાહબાઝ અહેમદ, વિપ્રજ નિગમ, હર્ષ દુબે, તનુષ કોટિયન, હર્ષિત રાણા, પ્રિન્સ યાદવ અને અર્શદ ખાન.
