ભારત વિશ્વનું સૌથી સુરક્ષિત અને વિશ્વસનીય રોકાણ સ્થળ: પિયુષ ગોયલ

મુંબઈ, 4 જૂન 2026: કેન્દ્રીય વાણિજ્ય અને ઉદ્યોગ મંત્રી પિયુષ ગોયલે મુંબઈમાં આયોજિત ‘સિટી ઇન્ડિયા કોન્ફરન્સ 2026’માં વર્ચ્યુઅલ માધ્યમથી મુખ્ય પ્રવચન આપ્યું હતું. પોતાના સંબોધનમાં તેમણે ભારપૂર્વક જણાવ્યું હતું કે ભારત આજે વિશ્વના સૌથી વિશ્વસનીય રોકાણ સ્થળ તરીકે ઉભરી આવ્યું છે. તેમણે ઉત્પાદન, વ્યવસાયિક સુગમતા, ઇન્ફ્રાસ્ટ્રક્ચર, આધુનિક ટેક્નોલોજી અને વૈશ્વિક વેપાર જોડાણને મજબૂત કરવા માટે સરકાર દ્વારા લેવામાં આવેલા ઐતિહાસિક પગલાંઓની વિગતવાર રૂપરેખા આપી હતી. વૈશ્વિક રોકાણકારો અને વ્યાપારી અગ્રણીઓને સંબોધતા પિયુષ ગોયલે આત્મવિશ્વાસ વ્યક્ત કર્યો હતો કે ભારત વિશ્વની સૌથી ઝડપથી વિકસતી અર્થવ્યવસ્થા છે અને આગામી બે દાયકાથી વધુ સમય સુધી દેશ આ ટોચનું સ્થાન જાળવી રાખશે. ભારતે વૈશ્વિક ભૌગોલિક-રાજકીય અને આર્થિક કટોકટીઓને સતત મોટી તકોમાં રૂપાંતરિત કરી છે.

પિયુષ ગોયલે જણાવ્યું કે કેનેડા અને અમેરિકાની તેમની તાજેતરની મુલાકાતો દરમિયાન ભારતીય અર્થતંત્ર પર વૈશ્વિક રોકાણકારોનો અસાધારણ વિશ્વાસ જોવા મળ્યો છે. કેનેડા સાથે પ્રસ્તાવિત મુક્ત વેપાર કરાર માટે મોટો સકારાત્મક પ્રતિસાદ મળ્યો છે અને ત્યાંના પેન્શન ફંડ્સ તેમજ વીમા કંપનીઓ ભારતમાં રોકાણ કરવા ઉત્સુક છે. બીજી તરફ, ન્યૂયોર્કમાં અગ્રણી ઇન્વેસ્ટમેન્ટ ફર્મ્સ અને અંદાજે 50 મોટી કંપનીઓ સાથેની ચર્ચા બાદ એ સ્પષ્ટ થયું છે કે વિશ્વ હવે ભારતને એકમાત્ર વૈકલ્પિક મેન્યુફેક્ચરિંગ હબ અને વિશ્વસનીય ભાગીદાર માને છે. રોકાણકારો માટે હવે પ્રશ્ન એ નથી કે ભારતમાં રોકાણ કરવું કે નહીં, પરંતુ પ્રશ્ન એ છે કે તેઓ કેટલી ઝડપથી ભારતની વિકાસ યાત્રામાં સામેલ થાય છે.

• કેનેડા અને યુએસ પ્રવાસ દરમિયાન દેખાયો ભારતનો દબદબો

મંત્રીએ ભારતમાં વિદેશી કંપનીઓની સફળતાના બે મોટા ઉદાહરણો આપ્યા હતા. વર્ષ 1999 માં માત્ર 200 મિલિયન યુએસ ડોલર સાથે ભારતમાં પ્રવેશેલી હ્યુન્ડાઈ કંપનીએ આજે ઇન્ફ્રાસ્ટ્રક્ચરની મર્યાદાઓ વચ્ચે પણ ભારતીય બજારમાંથી ડિવિડન્ડ અને રોયલ્ટી દ્વારા અદભૂત વળતર મેળવ્યું છે. શરૂઆતના તબક્કામાં ભારતમાં પ્રવેશેલી જેસીબી કંપની આજે સ્થાનિક માંગ સંતોષવાની સાથે ભારતમાં બનેલા ઉત્પાદનોની નિકાસ વિશ્વના લગભગ 130 દેશોમાં કરી રહી છે.

વૈશ્વિક વેપાર અંગે માહિતી આપતા તેમણે જણાવ્યું કે ભારતે છેલ્લા સાડા ત્રણ વર્ષમાં 38 વિકસિત અર્થતંત્રોને આવરી લેતા નવ (9) મુક્ત વેપાર કરારો સાઇન કર્યા છે. ઓમાન સાથેનો મુક્ત વેપાર કરાર 1 જૂનથી અમલમાં આવી ચૂક્યો છે. આગામી 6 મહિનામાં અન્ય 2 થી 3 અને આગામી એક વર્ષમાં બીજા 3-4 મહત્વપૂર્ણ વેપાર કરારો થવાની સંભાવના છે. વ્યવસાયિક સુગમતા વધારવા માટે એપ્રિલ મહિનામાં ‘જન વિશ્વાસ અધિનિયમ 2.0’ લાવવામાં આવ્યો છે, જે અંતર્ગત કેન્દ્રીય કાયદાઓમાંથી લગભગ 1,000 જેટલા નાના-મોટા ગુનાઓને બિન-ગુનાહિત કરવામાં આવ્યા છે. આ ઉપરાંત, શ્રમ સુધારા અંતર્ગત 29 જટિલ શ્રમ કાયદાઓને 4 સરળ લેબર કોડમાં એકીકૃત કરવામાં આવ્યા છે, જેનો અમલ રાજ્યોએ શરૂ કરી દીધો છે.