નવી દિલ્હીઃ લીકર પોલીસી કેસમાં ધરપકડ કરાયેલા આમ આદમી પાર્ટીના નેતા અરવિંદ કેજરિવાલની અરજી ઉપર દિલ્હી હાઈકોર્ટમાં સુનાવણી હાથ ધરાઈ હતી. કેજરિવાલે લીકર પોલીસી કેસમાં ઈડી અને લોવર કોર્ટના જેલમાં મોકલવાના આદેશને પડકારવામાં આવ્યો છે. કોર્ટમાં સુનાવણીમાં કેજરિવાલના વકીલ અભિષેક મનુ સિંઘવીએ જણાવ્યું હતું કે, તેમની ધરપકડ અપમાનિત અને પહેરાશ કરવા કરાઈ છે.
ન્યાયમૂર્તિ સ્વર્ણ કાંત શર્માની ખંડપીઠ સમક્ષ અભિષેક મનુ સિંઘવીએ રજુઆત કરાઈ હતી કે, પહેલો મુદ્દો ચૂંટણીમાં સમાન તક સાથે સંબંધિત છે. દિલ્હીના સીએમની ધરપકડ એવા સમયે થઈ છે જે તેમને રાજકીય પ્રક્રિયામાં ભાગ લેતા અટકાવે છે. મતદાન પહેલા જ તેમની પાર્ટીને ખતમ કરવાના પ્રયાસો થઈ રહ્યા છે.
દિલ્હીના સીએમના વકીલે કોર્ટમાં કહ્યું કે, અરજીકર્તા (અરવિંદ કેજરીવાલ)ની માર્ચ 2024માં બે વર્ષ જૂના કેસમાં ધરપકડ કરવામાં આવી હતી. આ સમય ઘણું બધું કહી જાય છે. હું રાજનીતિની નહીં પણ કાયદાની વાત કરું છું. અહીં ધરપકડનો સમય સ્પષ્ટપણે ગેરબંધારણીય હેતુ દર્શાવે છે. તેમણે કહ્યું કે બીજો મુદ્દો એ છે કે ED પાસે સમન્સ મોકલવા માટે કોઈ સામગ્રી નથી. પૂછપરછ અને નિવેદન લીધા વિના ધરપકડ કરવામાં આવી હતી.
સુનાવણી દરમિયાન અભિષેક મનુ સિંઘવીએ કહ્યું કે, ઘરે આવીને નિવેદન લેવાનો કોઈ પ્રયાસ કરવામાં આવ્યો નથી. પ્રશ્નોની યાદી સોંપવામાં આવી ન હતી. જે રીતે EDની ટીમ ધરપકડના દિવસે ઘરે આવી હતી. એ જ રીતે, અગાઉ આવીને પ્રશ્નો સોંપી શકાયા હોત. નિવેદન લઈ શકાયું હોત. કેજરીવાલના વકીલે સવાલ કર્યો કે શું ખરેખર ધરપકડની જરૂર હતી. આદર્શ આચારસંહિતા લાગુ થયા પછી, ધરપકડ માત્ર અપમાનિત કરવા અને હેરાન કરવા માટે કરવામાં આવી હતી.
કેજરીવાલની અરજી પર સુનાવણી દરમિયાન સિંઘવીએ સવાલ કર્યો કે, પીએમએલએમાં જામીન મેળવવા મુશ્કેલ બનાવવામાં આવ્યા છે, પરંતુ કલમ 19 હેઠળ ધરપકડ માટે શરતો પણ રાખવામાં આવી છે. શું તેઓ અનુસરવામાં આવ્યા હતા? ધરપકડનો હેતુ કંઈક બીજો જ હોય તેમ લાગી રહ્યું છે. વકીલે પૂછ્યું કે શું કેજરીવાલના ભાગી જવાનો ખતરો છે? શું તે કેસના દોઢથી બે વર્ષ પછી પુરાવાને પ્રભાવિત કરી શક્યા હોત? કહેવાય છે કે દિલ્હીના સીએમ સહકાર આપી રહ્યા ન હતા. આ ખોટું છે. શું આના આધારે જ ધરપકડ થઈ શકે?
ED વતી કોર્ટમાં હાજર રહેલા એડિશનલ સોલિસિટર જનરલ એસવી રાજુએ કહ્યું કે, સિંઘવી જ્યાંથી રજૂ કરી રહ્યા છે તે દલીલોની નકલ અમને આપવામાં આવી નથી. હું કેવી રીતે જવાબ આપીશ? તેના પર સિંઘવીએ કહ્યું કે તમને કોપી આપવામાં આવી છે. પૃષ્ઠ નંબરો આનાથી કંઈક અલગ છે. તમને નવી નકલ આપવામાં આવી રહી છે, પરંતુ આ રીતે વાત કરીને સુનાવણીને મુલતવી રાખવાનો પ્રયાસ કરશો નહીં.
સિંઘવીએ કહ્યું કે જે રીતે કેજરીવાલને મનપસંદ નિવેદન આપવા બદલ ધરપકડ કરવામાં આવી છે. આ ફિક્સ્ડ મેચ જેવું લાગે છે. ASG રાજુએ ફરી એકવાર કહ્યું કે તેમને સંપૂર્ણ દસ્તાવેજો આપવામાં આવ્યા નથી. તેઓ મને મારા વિચારો યોગ્ય રીતે વ્યક્ત કરતા રોકવાનો પ્રયાસ કરી રહ્યા છે.
