નવી દિલ્હી, 18 જુલાઈ 2026: ભારતીય રાષ્ટ્રીય ધોરીમાર્ગ સત્તામંડળ (NHAI) એ દેશના નેશનલ હાઇવે નેટવર્કના સંચાલન અને જાળવણીને વધુ વ્યાવસાયિક, કાર્યક્ષમ અને આધુનિક ટેકનોલોજી આધારિત બનાવવા માટે એક મોટો અને વ્યૂહાત્મક નિર્ણય લીધો છે. NHAI દ્વારા પ્રાયોજિત રાષ્ટ્રીય ધોરીમાર્ગ ઇન્ફ્રા ટ્રસ્ટ (NHIT) એ તેના વિશાળ હાઇવે નેટવર્કને વૈશ્વિક કક્ષાએ સંચાલિત કરવા માટે ખાસ જનરલ મેનેજમેન્ટ કન્સલ્ટન્ટ્સ (GMCs) ની નિમણૂક કરવાની સત્તાવાર જાહેરાત કરી છે.
ઓક્ટોબર 2020 માં સેબી (SEBI) હેઠળ નોંધાયેલું NHIT હાલમાં દેશભરમાં અંદાજે 2653 કિલોમીટર લાંબા રાષ્ટ્રીય ધોરીમાર્ગોનું સફળતાપૂર્વક સંચાલન કરી રહ્યું છે. આ નવી પહેલ હેઠળ, પ્રથમ તબક્કામાં 908 કિલોમીટર લાંબા હાઇવેના સંચાલન, દેખરેખ અને સર્વાંગી વિકાસની જવાબદારી આ નવનિયુક્ત જનરલ મેનેજમેન્ટ કન્સલ્ટન્ટ્સને સોંપવામાં આવશે.
આ એક્સપર્ટ કન્સલ્ટન્ટ્સ હાઇવેનું નિયમિત અને બારીકાઈથી ડિજિટલ નિરીક્ષણ કરશે અને રસ્તાઓની તાત્કાલિક જાળવણીની જરૂરિયાતો ઓળખવામાં મહત્વની ભૂમિકા ભજવશે. માર્ગ સલામતીના કડક પગલાં લાગુ કરવા, રસ્તા પરની ખામીઓનું યુદ્ધના ધોરણે સમારકામ કરવું અને હાઇવેની ટ્રાફિક ક્ષમતા વધારવામાં આ એજન્સીઓ મદદ કરશે. આ સમગ્ર પ્રક્રિયા માટે અદ્યતન વૈજ્ઞાનિક સાધનો અને આધુનિક ટેકનોલોજીનો ઉપયોગ કરવામાં આવશે.
આ કન્સલ્ટન્ટ્સ હાઇવેના જુદા જુદા કામો માટે વિશિષ્ટ એજન્સીઓ અને સબ-કોન્ટ્રાક્ટરોની પસંદગી કરશે તેમજ ચાલી રહેલા વિકાસકાર્યોનું કડક નિરીક્ષણ કરી તેની ગુણવત્તાના આધારે પૂર્ણતા પ્રમાણપત્ર આપશે. આ ઉપરાંત હાઇવે પરના ટોલ પ્લાઝાની કામગીરી સુધારી વાહનચાલકોનો સમય બચાવવા સ્માર્ટ ટ્રાફિક મેનેજમેન્ટ લાગુ કરશે અને સેબીના નીતિ-નિયમોના પાલનની ખાતરી કરશે.
NHAI ના જણાવ્યા અનુસાર, આ કદમનો મુખ્ય ઉદ્દેશ્ય ભારતીય રસ્તાઓ પર વૈશ્વિક સ્તરની શ્રેષ્ઠ પદ્ધતિઓ લાવવાનો છે, જેથી મુસાફરોને ખાડામુક્ત અને આરામદાયક પ્રવાસનો અનુભવ મળી શકે. આ નવું મોડેલ હાઇવે જાળવણીના ક્ષેત્રમાં વિશિષ્ટ એજન્સીઓનું એક આખું નવું નેટવર્ક ઊભું કરશે, જે ભવિષ્યમાં મોટા પાયે રોજગારી, નવીનતા અને ઇન્ફ્રાસ્ટ્રક્ચર ઇન્વેસ્ટમેન્ટને આકર્ષશે.
