ઉત્તર ભારત સહિત દેશભરમાં હાલ કાળઝાળ ગરમી પડી રહી છે અને તાપમાનનો પારો ૪૫ ડિગ્રીને પાર પહોંચી ગયો છે. આકરા તાપ અને લૂ થી બચવા માટે લોકો વિવિધ રસ્તાઓ અપનાવી રહ્યા છે. ઉનાળાની આ કાળઝાળ ગરમીમાં શરીરને હાઇડ્રેટ રાખવા માટે મોટાભાગના લોકો માત્ર પાણી પીવા પર નિર્ભર રહી શકે નહીં. આપણા ભારતીય ઘરોમાં દાદી-નાનીના સમયથી અનેક પ્રકારના શરબત બનાવવામાં આવે છે, જે શરીરને હાઇડ્રેટ રાખવાની સાથે પોષણ પણ આપે છે. પરંતુ આજે આપણે એક એવા ખાસ શરબત વિશે વાત કરીશું જે કેરળના કોચીની શેરીઓમાંથી લોકો વચ્ચે લોકપ્રિય બન્યું છે. આ એક ચટપટું અને ટેન્ગી મોકટેલ છે. આપણે જે શરબતની વાત કરી રહ્યા છીએ તે સ્વાદમાં તો લાજવાબ છે જ, પરંતુ તે તમારા પાચનતંત્રને પણ સુધારે છે અને ઉકળાટ ભરી ગરમીમાં લૂ થી રક્ષણ આપે છે. આ શરબતનું નામ છે ‘કુલુક્કી’. આ કેરળની એક ખૂબ જ પ્રખ્યાત સ્ટ્રીટ ડ્રિંક છે, જેને ‘શેકન લેમોનેડ’ તરીકે પણ ઓળખવામાં આવે છે. મલયાલમ ભાષામાં ‘કુલુક્કી’ નો અર્થ થાય છે ‘હલાવેલું’ અથવા ‘શેક કરવું’. મૂળ રૂપે આ શરબત ઉત્તર કેરળના કોઝિકોડ શહેરનું છે, પરંતુ તેની રેસિપી કેરળની રાજધાની કોચીના રસ્તાઓ પરથી પ્રખ્યાત થઈ.
સામગ્રી
નાળિયેર પાણી: 1 ગ્લાસ
મોટું લીંબુ: 1 નંગ
લીલું મરચું: 1 નંગ
પલાળેલા સબજાના બીજ (તકમરિયાં): 1 ચમચી
દળેલી ખાંડ: દોઢ ચમચી
તાજા ફુદીનાના પાન: 5-6 નંગ
બરફના ટુકડા : જરૂરિયાત મુજબ
સંચળ (કાળું મીઠું): 1 ચપટી
બનાવવાની રીત
સૌપ્રથમ એક શેકર અથવા ઍર-ટાઇટ જાર લો અને તેમાં નાળિયેર પાણી નાખો. હવે આ નાળિયેર પાણીમાં દળેલી ખાંડ, ફુદીનાના પાન (હાથથી તોડીને નાખો), લીંબુનો રસ અને બરફના ટુકડા ઉમેરો. આ બધી સામગ્રીને ઓછામાં ઓછી ૧૫ સેકન્ડ માટે બરાબર શૅક કરો (હલાવો) જેથી તેમાં એક સરસ ફિઝ (પરપોટા) ઉત્પન્ન થાય. હવે એક સર્વિંગ ગ્લાસ લો. તેમાં બરફના ટુકડા, પલાળેલા સબજાના બીજ, વચ્ચેથી ઊભો કાપો મારેલું લીલું મરચું અને લીંબુની સ્લાઈસ નાખો. બધી વસ્તુઓ ગ્લાસમાં નાખ્યા પછી, તેમાં શેક કરેલું નાળિયેર પાણી રેડો. ઉપરથી એક ચપટી સંચળ ઉમેરો અને ચમચી વડે હળવેથી મિક્સ કરો. આ રીતે તમારું ચટપટું, ટેન્ગી અને સ્વીટ ફ્લેવરવાળું એનર્જેટિક કુલુક્કી શરબત બનીને તૈયાર છે. આમાં વપરાતા ઘટકો જેવા કે નાળિયેર પાણી, સબજાના બીજ, લીંબુ, સંચળ અને લીલું મરચું તમારા પાચનને સુધારવામાં મદદ કરે છે, લૂ થી બચાવે છે અને થાકેલા શરીરને ઇન્સ્ટન્ટ એનર્જી પ્રદાન કરે છે.
