મુંબઈ, 23 મે 2026: બોલિવૂડ એક્ટર રણદીપ હુડ્ડા ટૂંક સમયમાં જ ડિરેક્ટર લક્ષ્મણ ઉતેકરની આગામી ફિલ્મ ‘ઇથા’ માં બોલિવૂડ અભિનેત્રી શ્રદ્ધા કપૂર સાથે મુખ્ય ભૂમિકામાં જોવા મળશે. આ નવી ફિલ્મની ચર્ચાઓ વચ્ચે અભિનેતાએ એક મોટો ખુલાસો કર્યો છે. રણદીપે જણાવ્યું કે તેને વર્ષ 2025ની મેગા હિટ ફિલ્મ ‘છાવા’ માં મુઘલ બાદશાહ ઔરંગઝેબનો રોલ ઓફર કરવામાં આવ્યો હતો. આ ફિલ્મમાં વિકી કૌશલ લીડ રોલમાં હતો અને આ ફિલ્મ બોક્સ ઓફિસ પર સૌથી વધુ કમાણી કરનારી હિન્દી ફિલ્મોમાંની એક સાબિત થઈ છે. રણદીપે જણાવ્યું કે તેણે ઔરંગઝેબના રોલ માટે ના પાડી દીધી હતી, જેના પછી આ પાવરફુલ રોલ અક્ષય ખન્નાએ ભજવ્યો હતો.
ઔરંગઝેબનો રોલ ન સ્વીકારવા પાછળનું કારણ જણાવતાં રણદીપ હુડ્ડાએ જણાવ્યું હતું કે, જ્યારે ડિરેક્ટર લક્ષ્મણ ઉતેકરે ‘છાવા’ માટે તેનો સંપર્ક કર્યો હતો, ત્યારે તે માનસિક રીતે યોગ્ય સ્થિતિમાં ન હતો. તેણે કહ્યું કે તે સમયે તેનું વજન ખૂબ જ ઓછું હતું અને તેણે પોતાનું માથું પણ મુંડન કરાવેલું હતું. કારણ કે, તેણે તે જ સમયે તેની બાયોપિક ફિલ્મ ‘સ્વાતંત્ર્ય વીર સાવરકર’ નું શૂટિંગ પૂરું કર્યું હતું.
રણદીપે વધુમાં ઉમેર્યું, “હું તે સમયે એક કેસમાંથી પસાર થઈ રહ્યો હતો અને તે સમગ્ર ઘટનાક્રમ સાથે જોડાયેલા ઘણા જટિલ મુદ્દાઓ હતા. હું તે રસ્તે બિલકુલ જવા માંગતો ન હતો. આ સ્થિતિમાં જ્યારે આ નવો પ્રોજેક્ટ (ઇથા) મારી સામે આવ્યો, ત્યારે મને તે ખૂબ જ આકર્ષક લાગ્યો.” રણદીપ હુડ્ડાના વર્ક ફ્રન્ટની વાત કરીએ તો, તે તાજેતરમાં જ વેબ સિરીઝ ‘ઇન્સ્પેક્ટર અવિનાશ 2’ માં જોવા મળ્યો હતો. નીરજ પાઠકના નિર્દેશનમાં બનેલી આ સિરીઝની બીજી સિઝન 15 મેના રોજ જિયો હોટસ્ટાર પર રિલીઝ થઈ છે જેને દર્શકોનો સારો પ્રતિસાદ મળી રહ્યો છે. હવે ચાહકો તેને ‘ઇથા’માં શ્રદ્ધા કપૂર સાથે એકદમ નવા જ અવતારમાં જોવા માટે આતુર છે.
