રસોડામાં સોજી (રવો) જોઈએ એટલે સામાન્ય રીતે શિરો કે ઉપમા બનાવવાનો જ વિચાર આવે છે. પરંતુ દરરોજ એક જ પ્રકારનો નાસ્તો ખાવાથી ઘરના સભ્યો કંટાળી જાય છે. આવા સમયે ઓછા સમયમાં અને ઓછા તેલ-મસાલામાં સોજીમાંથી બનતો ચટપટો અને કુરકુરો નાસ્તો શ્રેષ્ઠ વિકલ્પ છે. ચાલો જાણીએ સોજીમાંથી બનતી 5 સરળ વાનગીઓ વિશે:
- ક્રિસ્પી સોજી પિઝા પોકેટ્સ
મેંદાના સમોસા કે બહારના પિઝાને બદલે સોજીમાંથી આ ચીઝી નાસ્તો બનાવી શકાય છે.
બનાવવાની રીતઃ સોજીમાં થોડું દહીં, મીઠું અને નવશેકું પાણી ઉમેરી લોટ બાંધી 15 મિનિટ રહેવા દો. સ્ટફિંગ માટે કેપ્સિકમ, બાફેલી મકાઈ, પનીર, મોઝરેલા ચીઝ, ઓરેગાનો, ચિલી ફ્લેક્સ અને પિઝા સોસ મિક્સ કરો. સોજીના લોટની નાની પૂરી વણી વચ્ચે મસાલો મૂકી પોકેટનો આકાર આપો. તવા પર હળવા તેલમાં બંને બાજુ ક્રિસ્પી થાય ત્યાં સુધી શેકી લો.
- સોજી-બીટરૂટ કોઈન્સ
દેખાવમાં આકર્ષક અને ખાવામાં પૌષ્ટિક એવો આ નાસ્તો મહેમાનો માટે પણ બેસ્ટ છે.
બનાવવાની રીતઃ સોજી અને દહીંનું ઘટ્ટ ખીરૂં બનાવો. તેમાં છીણેલું બીટરૂટ, બાફેલા વટાણા, પનીર, આદુ અને ગરમ મસાલો ઉમેરો. બીટના કારણે ખીરૂં ગુલાબી થઈ જશે. પકવતા પહેલા ચપટી બેકિંગ સોડા ઉમેરી નોન-સ્ટિક તવા પર નાના ગોળ સિક્કા (કોઈન) આકારમાં ફેલાવો. ઘી કે તેલ લગાવી બંને બાજુ શેકી લો.
-
સોજી કચોરી રોલ્સ
ડીપ ફ્રાય કરેલી કચોરીઓથી બચવા માટે આ ઓછી કેલરી વાળી રેસિપી ઉત્તમ વિકલ્પ છે.
બનાવવાની રીતઃ કઢાઈમાં પાણી, મીઠું અને તેલ ઉકાળી તેમાં સોજી ઉમેરી સતત હલાવતા રહો. સોજી પાણી સોષી લે એટલે ગેસ બંધ કરી તેને લોટની જેમ લીસી કરી લો. બાફેલા બટાકા, લીલા મરચાં, આમચૂર, વરિયાળી અને મસાલા ભેગા કરી પુરણ બનાવો. સોજીના લોટની રોટલી વણી પર મસાલો ફેલાવી ટાઈટ રોલ બનાવો. રોલના સ્લાઈસ કાપી તવા પર ઓછા તેલમાં શેકી લો.
-
સોજી સેવરી મફિન્સ
શાકભાજીથી ભરપૂર આ નમકીન મફિન્સ બાળકોના સ્કૂલ ટિફિન માટે એકદમ સોફ્ટ અને હેલ્થી છે.
બનાવવાની રીતઃ સોજી, છાશ/દહીં અને પાણી મેળવી મધ્યમ ખીરૂં બનાવો. તેમાં ઝીણા સમારેલા કાંદા, ટામેટાં, લીલા મરચાં, કોથમરી અને રાઈ-લીમડાનો વઘાર ઉમેરો. સ્ટીમ કરતા પહેલા એક પેકેટ ઈનો ઉમેરી મિક્સ કરો. નાની વાટકીઓમાં તેલ લગાવી ખીરૂં ભરો, ઉપર સફેદ તલ છાંટી 10 થી 12 મિનિટ વરાળમાં બાફી લો.
-
સોજી પેરી-પેરી ફ્રાઈસ
બટાકાના ફ્રેન્ચ ફ્રાઈસ પોચા પડી જાય છે, પરંતુ સોજીના આ ફ્રાઈસ લાંબા સમય સુધી કુરકુરા રહે છે.
બનાવવાની રીતઃ વાસણમાં પાણી, મીઠું, મરી પાવડર અને બટર ઉકાળો. તેમાં સોજી ઉમેરી ઘટ્ટ થાય ત્યાં સુધી રંધાવા દો. ગેસ બંધ કરી છીણેલું પનીર અને કોથમરી મિક્સ કરો. આ મિશ્રણને થાળીમાં ફેલાવી 20 મિનિટ ફ્રિજમાં સેટ થવા મૂકો. ત્યારબાદ ફ્રેન્ચ ફ્રાઈસની જેમ લાંબી પટ્ટીઓ કાપી શેલો ફ્રાય કરો અને ઉપરથી પેરી-પેરી મસાલો છાંટી ગરમાગરમ પીરસો.
