નવી દિલ્હી, 24 જૂન 2026: નવી દિલ્હીમાં 16મી બ્રિક્સ (BRICS) રાષ્ટ્રીય સુરક્ષા સલાહકાર (NSA) બેઠકના બે દિવસીય કાર્યક્રમ બાદ બ્રિક્સ દેશોના રાષ્ટ્રીય સુરક્ષા સલાહકારો અને વરિષ્ઠ સુરક્ષા અધિકારીઓએ પ્રધાનમંત્રી નરેન્દ્ર મોદી સાથે મુલાકાત કરી હતી. પ્રધાનમંત્રી મોદીએ સોશિયલ મીડિયા પ્લેટફોર્મ ‘એક્સ’ પર પોસ્ટ કરતા કહ્યું કે તેઓ આ તમામ સુરક્ષા સલાહકારો અને વરિષ્ઠ અધિકારીઓને મળીને ખુશ થયા છે.
તેમણે કહ્યું, “બદલાતા વૈશ્વિક માહોલમાં બ્રિક્સની ભૂમિકા ખૂબ જ મહત્વપૂર્ણ છે. તે સુરક્ષા સહયોગને મજબૂત કરવા અને આતંકવાદ, સાયબર સુરક્ષા અને નવી ટેકનોલોજી જેવા સામાન્ય પડકારોનો સામનો કરવામાં મદદ કરી શકે છે. ભારતની અધ્યક્ષતાનો ઉદ્દેશ્ય વ્યાવહારિક સહયોગને આગળ વધારવો, ગ્લોબલ સાઉથ (વિકાસશીલ દેશો)ની પ્રાથમિકતાઓને સમર્થન આપવું અને સુરક્ષિત, મજબૂત અને સર્વસમાવેશક વિશ્વ બનાવવામાં યોગદાન આપવાનો છે.”
સુરક્ષા પડકારો પર થઈ ચર્ચા
બે દિવસીય બેઠક દરમિયાન બ્રિક્સ દેશોના રાષ્ટ્રીય સુરક્ષા સલાહકારો અને પ્રતિનિધિમંડળના વડાઓએ વિશ્વની સામે રહેલા સુરક્ષા પડકારો પર વિચાર-વિમર્શ કર્યો હતો. વિદેશ મંત્રાલય (MEA) દ્વારા જારી કરવામાં આવેલા નિવેદનમાં કહેવામાં આવ્યું છે કે બેઠકમાં બિન-પરંપરાગત સુરક્ષા પડકારો પર પણ ચર્ચા કરવામાં આવી હતી. જેમાં ઉર્જા સુરક્ષા, ખાદ્ય સુરક્ષા, સપ્લાય ચેઈન (પુરવઠા વ્યવસ્થા)ની સુરક્ષા, આતંકવાદી સંગઠનો દ્વારા ઉપયોગમાં લેવાતી નવી ટેકનોલોજી, સાયબર સુરક્ષા અને જળવાયુ પરિવર્તનથી પેદા થતી અસ્થિરતા જેવા મુદ્દાઓ સામેલ હતા.
વિદેશ મંત્રાલયના જણાવ્યા અનુસાર, ટોચના સુરક્ષા અધિકારીઓએ બ્રિક્સના ‘આતંકવાદ વિરોધી સંયુક્ત કાર્ય જૂથ’ અને ‘માહિતી અને સંચાર ટેકનોલોજીના સુરક્ષિત ઉપયોગ’ સાથે જોડાયેલા કાર્ય જૂથોની પ્રવૃત્તિઓ અને પરિણામોની પણ સમીક્ષા કરી હતી. આતંકવાદ વિરોધી કાર્ય જૂથની બેઠક આ વર્ષે 21-22 મેના રોજ યોજાઈ હતી, જ્યારે માહિતી અને સંચાર ટેકનોલોજીને લગતી બેઠક આ મહિનાની શરૂઆતમાં યોજાઈ હતી.
નિવેદનમાં કહેવામાં આવ્યું છે કે નેતાઓએ બ્રિક્સ દેશો વચ્ચે સહયોગ વધારવાનું સમર્થન કર્યું હતું. ખાસ કરીને સભ્ય દેશોની ક્ષમતાઓને મજબૂત કરવા, માહિતી શેર કરવા અને આતંકવાદ તથા સાયબર ખતરાઓ સામે મળીને લડવા માટે કાયદા અમલીકરણ એજન્સીઓ વચ્ચે બહેતર તાલમેલ પર ભાર મૂકવામાં આવ્યો હતો.
તેમણે આતંકવાદના દરેક સ્વરૂપ અને દરેક રીત સામે લડાઈ ચાલુ રાખવાની પ્રતિબદ્ધતા દોહરાવી હતી. સાથે જ, આતંકવાદી સંગઠનો દ્વારા નવી ટેકનોલોજીના ઉપયોગને રોકવાની જરૂરિયાત પર પણ સહમતિ વ્યક્ત કરી હતી. બેઠકમાં સામેલ રાષ્ટ્રીય સુરક્ષા સલાહકારો અને પ્રતિનિધિમંડળના વડાઓએ 2026માં ભારતની બ્રિક્સ અધ્યક્ષતાને સંપૂર્ણ સમર્થન આપ્યું હતું. બેઠક પૂરી થયા બાદ તમામ સુરક્ષા સલાહકારો અને પ્રતિનિધિમંડળના વડાઓએ પ્રધાનમંત્રી નરેન્દ્ર મોદી સાથે મુલાકાત કરી હતી.
