નવી દિલ્હી, 29 જુલાઈ 2026: સંસદના નીચલા ગૃહ એટલે કે લોકસભામાં વિપક્ષના જોરદાર હોબાળો અને દેકારો વચ્ચે વિવાદાસ્પદ ‘એન્ટી પેપર લીક બિલ’ આખરે પાસ કરી દેવામાં આવ્યું છે. આ મહત્વપૂર્ણ બિલ પસાર થયા બાદ ગૃહની કાર્યવાહી ગુરુવારે સવારે 11 વાગ્યા સુધી સ્થગિત કરી દેવામાં આવી છે. આ અગાઉ ગૃહમાં બિલ પર થયેલી ચર્ચાનો જવાબ આપતા કેન્દ્રીય મંત્રી જીતેન્દ્ર સિંહે વિપક્ષી નેતા રાહુલ ગાંધી દ્વારા લગાવવામાં આવેલા આરોપોને ફગાવી દીધા હતા. તેમણે કટાક્ષ કરતા જણાવ્યું હતું કે, ‘કોકરોચ જનતા પાર્ટી’ના આંદોલન દરમિયાન કોઈ પેલેટ ગન ચલાવવામાં આવી ન હતી.
ગોળી ચલી જ નથી, તો આદેશનો સવાલ ક્યાંથી?
મંત્રી જીતેન્દ્ર સિંહે સ્પષ્ટતા કરતા કહ્યું હતું કે, “વાસ્તવમાં કોઈ ગોળી ચલી જ નથી. નિયમ મુજબ ગોળીબારનો આદેશ સરકાર આપતી નથી, પરંતુ સંબંધિત અધિકારીઓ અને મેજિસ્ટ્રેટ દ્વારા આપવામાં આવે છે.” તેમણે રાહુલ ગાંધી પર પ્રહાર કરતા ઉમેર્યું કે, જ્યારે પ્રદર્શન દરમિયાન વિદ્યાર્થીઓ કે આંદોલનકારીઓ પર ગોળીબારી થઈ જ નથી, ત્યારે ગોળી ચલાવવાનો આદેશ કોણે આપ્યો તેવા સવાલો પૂછવાનો કોઈ તર્ક જ બનતો નથી. સરકારના દાવા મુજબ, વિરોધ કરી રહેલા પ્રદર્શનકારીઓને કાબૂમાં લેવા માટે માત્ર સામાન્ય આંસુ ગેસના શેલ છોડવામાં આવ્યા હતા. રાહુલ ગાંધી વગર પાયે અને તથ્યો વગર નિવેદનો આપે છે.
‘વડાપ્રધાન બનવાની હસરત અધૂરી રહી ગઈ એટલે પીએમ આવાસ પહોંચ્યા’
કોંગ્રેસ નેતા રાહુલ ગાંધી પર રાજકીય નિશાન તાકતા જીતેન્દ્ર સિંહે ઉમેર્યું હતું કે, ગત ૨૧ જુલાઈના રોજ રાહુલ ગાંધી સીધા વડાપ્રધાનના નિવાસસ્થાન (PM આવાસ) પાસે જઈને બેસી ગયા હતા. તેમના મનમાં વડાપ્રધાન બનવાની જે અધૂરી હસરતો છે, તે કદાચ આ રીતે પૂરી કરવા માટે તેઓ ત્યાં પહોંચ્યા હશે.
મંત્રીએ કટાક્ષ કર્યો કે શરૂઆતમાં તો વિપક્ષ આ આંદોલન સાથે જોડવાથી બચી રહ્યો હતો કારણ કે તેમને લાગતું હતું કે આ આમ આદમી પાર્ટીનું આંદોલન છે. પરંતુ જ્યારે આંદોલન થોડું વેગ પકડી રહ્યું હોવાનો અંદાજ આવ્યો, ત્યારે તેઓ પણ તેમાં કૂદી પડ્યા. જો કે, અંતે જ્યારે સુરક્ષાકર્મીઓએ તેમને પીએમ આવાસની પાસેથી હટાવ્યા, ત્યારે તેઓ ખૂબ જ બેઆબરુ થઈને ત્યાંથી રવાના થયા હતા.
