દિલ્હી : પાકિસ્તાન આતંકવાદની ફેક્ટરી તરીકે દુનિયાભરમાં પ્રખ્યાત છે. ભારતમાં મુંબઈ અને દિલ્હી હુમલા પાછળ પાકિસ્તાનનો હાથ સામે આવ્યો છે. જેઓ પર આતંકવાદી હુમલાનો આરોપ છે તેઓ પાકિસ્તાનમાં ખુલ્લેઆમ ફરે છે. પરંતુ હવે પાક પીએમ શાહબાઝ શરીફે શુક્રવારે રાષ્ટ્રીય સુરક્ષા પરિષદ (NSC)ની બેઠક બોલાવી હતી જેમાં દેશમાંથી તમામ પ્રકારના આતંકવાદને ખતમ કરવા માટે એક વિશાળ અભિયાન ચલાવવાનો નિર્ણય લેવામાં આવ્યો હતો.
NSCની 41મી બેઠકની અધ્યક્ષતા વડા પ્રધાન શાહબાઝ દ્વારા કરવામાં આવી હતી અને તેમાં કેબિનેટ પ્રધાનો, મુખ્ય પ્રધાનો, સેવા વડાઓ, ગુપ્તચર વડાઓ અને અન્ય મહત્વપૂર્ણ વહીવટી અને લશ્કરી અધિકારીઓએ હાજરી આપી હતી. વડાપ્રધાન કાર્યાલય તરફથી શુક્રવારે જારી કરાયેલી એક અખબારી યાદીમાં જણાવાયું છે કે બેઠકમાં સમગ્ર દેશ અને સરકારના સમર્થન સાથે એક વ્યાપક અભિયાન ચલાવવાનો નિર્ણય લેવામાં આવ્યો હતો, જે નવેસરથી જોશ અને સંકલ્પ સાથે દેશને આતંકવાદના ખતરામાંથી મુક્ત કરશે.
તેમાં ઉમેર્યું હતું કે પાકિસ્તાનમાંથી તમામ પ્રકારના આતંકવાદને ખતમ કરવાની ઝુંબેશમાં રાજકીય, રાજદ્વારી, સુરક્ષા, આર્થિક અને સામાજિક સ્તરે પગલાં લેવાશે. અખબારી યાદીમાં જણાવાયું છે કે એક ઉચ્ચ સ્તરીય સમિતિની રચના કરવામાં આવી છે જે બે અઠવાડિયામાં અમલીકરણ અને કામગીરીની હદ અંગે ભલામણો આપશે.
દેશના રાજકીય રીતે નિર્ણાયક પંજાબ પ્રાંતમાં ચૂંટણી યોજવાને લઈને ન્યાયતંત્ર અને સંઘીય સરકાર વચ્ચે વધતા જતા અણબનાવ વચ્ચે આ બેઠક થઈ છે. NSC એ પાકિસ્તાનના વડા પ્રધાનની આગેવાની હેઠળની સંઘીય સંસ્થાકીય અને સલાહકાર સંસ્થા છે. વરિષ્ઠ રાષ્ટ્રીય સુરક્ષા સલાહકારો અને કેબિનેટ મંત્રીઓ સાથે રાષ્ટ્રીય સુરક્ષા અને વિદેશ નીતિના મુદ્દાઓ પર ચર્ચા કરવા માટે આ એક પ્રમુખ મંચ છે.
