રાષ્ટ્રપતિ દ્રૌપદી મુર્મુએ તેમના કાર્યકાળના ચાર વર્ષ પૂર્ણ થવા પર વિવિધ પ્રોજેક્ટ્સનું ઉદ્ઘાટન કર્યું
નવી દિલ્હી, 28 જુલાઈ 2026: Inauguration of various projects રાષ્ટ્રપતિ દ્રૌપદી મુર્મુએ આજે રાષ્ટ્રપતિ ભવન ખાતે તેમના કાર્યકાળના ચાર વર્ષ પૂર્ણ થવાના ઉપલક્ષમાં વર્ચ્યુઅલ માધ્યમથી વિવિધ પ્રોજેક્ટ્સનો શુભારંભ કર્યો. તેમના સંબોધનમાં તેમણે દેશના વિકાસ અને સાંસ્કૃતિક પુનરુત્થાન પર પ્રકાશ પાડ્યો. રાષ્ટ્રપતિ મુર્મુએ જણાવ્યું હતું કે છેલ્લા ચાર વર્ષોમાં સર્વસમાવેશી વિકાસની સાથે સાથે ભારતનો સમૃદ્ધ સાંસ્કૃતિક વારસો અને રાષ્ટ્રીય ગૌરવની ભાવનાને નવી ઊર્જા પ્રાપ્ત થઈ છે.
રાષ્ટ્રપતિએ જણાવ્યું હતું કે સરકારનો મુખ્ય ઉદ્દેશ્ય સમગ્ર દેશમાં ‘ભારતીયતા’ની ભાવનાને વધુ સુદ્રઢ કરવાનો રહ્યો છે. તેમણે નોંધ્યું હતું કે છેલ્લા ચાર વર્ષોમાં લેવામાં આવેલા મહત્વપૂર્ણ પગલાં સંસ્થાનવાદી માનસિકતાના અવશેષોને દૂર કરવામાં સફળ રહ્યા છે. રાષ્ટ્રપતિએ ઉમેર્યું હતું કે દેશ હવે તેના મૂળ તરફ પાછો ફરી રહ્યો છે અને પોતાના સાંસ્કૃતિક તથા લોકતાંત્રિક આદર્શો પર ગર્વ અનુભવી રહ્યો છે.
વિવિધ પ્રોજેક્ટ્સનું ઉદ્ઘાટન
રાષ્ટ્રપતિએ રાષ્ટ્રપતિ ભવન પરિસરના બાળકો માટે ‘બચપન-બાલ પરિસર’નું ઉદ્ઘાટન કર્યું. આ પહેલમાં ‘કિલકારી’ નામનું બાળકો માટેનું રમતનું મેદાન અને ‘સમર્થ આંગણવાડી-કમ-ક્રેચ’ (આંગણવાડી અને શિશુ સંભાળ કેન્દ્ર)નો સમાવેશ થાય છે. આ સુવિધાઓ બાળકોના વિકાસ અને ઘડતર માટે સુરક્ષિત અને પોષણક્ષમ વાતાવરણ પૂરું પાડે છે. આ પ્રસંગે, સંકુલની મુલાકાત દરમિયાન તેમણે બાળકો સાથે સંવાદ પણ કર્યો.
રાષ્ટ્રપતિ મુર્મુએ પર્યાવરણ-અનુકૂળ અને સર્વસમાવેશી પરિવહનને પ્રોત્સાહન આપવા માટે ‘રાહી’ (Rahi) નામની મફત ઇલેક્ટ્રિક બસ સેવા પણ શરૂ કરી, જેનું પૂરું નામ ‘રાષ્ટ્રપતિ ભવન એક્સેસ એન્ડ હેરિટેજ ઇન્ટરસેપ્ટર’ છે. સંપૂર્ણપણે મહિલાઓ દ્વારા સંચાલિત આ બસ સેવા રાષ્ટ્રપતિ ભવનના કર્મચારીઓ અને ત્યાં રહેતા લોકો માટે શરૂ કરવામાં આવી છે. આ બસમાં ૨૭ મુસાફરોની બેઠક ક્ષમતા છે. આ પહેલનો ઉદ્દેશ્ય મહિલાઓ, બાળકો, વરિષ્ઠ નાગરિકો અને દિવ્યાંગ વ્યક્તિઓ માટે સુરક્ષિત પરિવહન સુવિધા પૂરી પાડવાનો છે.
આ ઉપરાંત, રાષ્ટ્રપતિ ભવનના દૈનિક મુલાકાતીઓના અનુભવને વધુ બહેતર બનાવવા માટે રાષ્ટ્રપતિએ એપ-આધારિત બહુભાષી ઈ-ઓડિયો ગાઈડનું ઉદ્ઘાટન કર્યું. હિન્દી, અંગ્રેજી અને ભારતીય બંધારણની આઠમી અનુસૂચિમાં સૂચિબદ્ધ અન્ય 14 ભાષાઓમાં ઉપલબ્ધ આ ઈ-ઓડિયો ગાઈડમાં સાંકેતિક ભાષાનો પણ સમાવેશ થાય છે.
તેમણે રાષ્ટ્રપતિને મળેલી 300 અધિકૃત ભેટો માટે ઈ-હરાજીની ત્રીજી આવૃત્તિ પણ શરૂ કરી. સામાજિક કાર્યોના ઉદ્દેશ્ય સાથે આયોજિત આ ઈ-હરાજી 5 ઓગસ્ટથી 5 સપ્ટેમ્બર, 2026 સુધી ખુલ્લી રહેશે.
વધુ વાંચો: હરિયાણામાં 700 નવા ‘વિટા’ (Vita) બૂથ ખુલશે, ડેરી ક્ષેત્રે મહિલાઓને પ્રોત્સાહન મળશે
