- આજે સુરત આવી શકે છે રાહુલ ગાંધી
- બે વર્ષની જેલની સજા સામે કરશે અરજી
- સુરતની સેશન્સ કોર્ટમાં કરશે અરજી
દિલ્હી :કોંગ્રેસના નેતા રાહુલ ગાંધી માનહાનિના કેસમાં બે વર્ષની સજા ફટકાર્યા બાદ મેજિસ્ટ્રેટના આદેશ સામે સુરતની સેશન્સ કોર્ટમાં અરજી કરશે. રાહુલ આજે એટલે કે સોમવારે પોતાના વકીલો સાથે સુરત કોર્ટ પહોંચી શકે છે.
રાહુલ ગાંધીને સુરતના ચીફ જ્યુડિશિયલ મેજિસ્ટ્રેટ એચએચ વર્મા દ્વારા ‘મોદી સરનેમ’ સાથે ચોરો વિશેની તેમની 2019ની ટિપ્પણી બદલ માનહાનિના કેસમાં દોષિત ઠેરવવામાં આવ્યા હતા. કોર્ટે કોંગ્રેસના નેતાને બે વર્ષની જેલની સજા ફટકારી છે. તેની સાથે, કોર્ટે રૂ. 15,000ના વ્યક્તિગત બોન્ડ પર તેના જામીન પણ મંજૂર કર્યા હતા અને તેને અપીલ કરવાની મંજૂરી આપવા માટે 30 દિવસ માટે સજાને સ્થગિત કરી હતી.
રાહુલ ગાંધીનું લોકસભા સભ્યપદ રદ્દ
ભાજપના ધારાસભ્ય પૂર્ણેશ મોદીએ રાહુલ ગાંધી વિરુદ્ધ માનહાનિનો કેસ દાખલ કર્યો હતો. વર્ષ 2019ની લોકસભા ચૂંટણી દરમિયાન કર્ણાટકના કોલારમાં એક રેલી દરમિયાન રાહુલ ગાંધીએ કહ્યું હતું – “તમામ ચોરોની અટક મોદી કેવી રીતે છે?” કોર્ટે સજા સંભળાવ્યા બાદ રાહુલ ગાંધીને લોકસભામાંથી ગેરલાયક ઠેરવવામાં આવ્યા હતા.
પટના કોર્ટે પણ રાહુલ ગાંધીને નોટિસ મોકલી
રાહુલ ગાંધી પણ તેમની 2019ની ટિપ્પણી માટે સુશીલ કુમાર મોદી દ્વારા દાખલ કરવામાં આવેલા અન્ય માનહાનિ કેસનો સામનો કરી રહ્યા છે. પટનાની એક કોર્ટે કથિત રીતે આ કેસના સંબંધમાં કોંગ્રેસ નેતાને 12 એપ્રિલે હાજર થવાનો આદેશ આપ્યો છે.
